काठमाडौं— अन्तरिक्षमा फसेका अन्तरिक्षयात्री सुनिता विलियम्स र बुच विल्मोर ९ महिना १३ दिनपछि पृथ्वीमा फर्किंदै छन् । स्पेसएक्सको अन्तरिक्ष यान ड्र्यागन इन्टरनेसनल स्पेस स्टेसनबाट पृथ्वीमा फर्किन अनडक भइसकेको छ ।
यो स्पेसक्राफ्टबाट १७ घन्टाको यात्रापछि अन्तरिक्ष यात्री सुनिता र बुच विल्मोर पृथ्वीमा आइपुग्नेछन् । यसका साथै नासाका अन्तरिक्षयात्री निक हाग र रुसको स्पेस एजेन्सी रसकसमसका अन्तरिक्षयात्री अलेक्सान्द्र गोरबुनोभ पनि यही स्पेसक्राफ्टबाट पृथ्वीमा आउँदै छन् ।
सुनिता र बुच विल्मोर ५ जून २०२४ मा परीक्षण उडान स्टारलाइनरबाट अन्तरिक्ष गएका थिए । उनीहरू ८ दिनमा पृथ्वीमा फर्किने योजना थियो, तर यानमा खराबी आएका कारण अन्तरिक्षमै अड्किएका थिए ।
नासाले मौसमको अवस्था हेरेर यान अवतरणको स्थान निर्धारण गर्ने जनाएको छ । मौसम अनुकूल भएमा बुधबार बिहान ३ बजेर २७ मिनेटमा फ्लोरिडाको तटमा अवतरण गरिनेछ ।
उनीहरू १९ मार्च, २०२५ मा पृथ्वीमा फर्किंदा अन्तरिक्षमा २८६ दिन बिताएका छन् । योसँगै सुनिता एक यात्रामा सबैभन्दा धेरै समय अन्तरिक्षमा बिताउने महिला अन्तरिक्षयात्रीको सूचीमा तेस्रो बन्नेछिन् ।
सबैभन्दा बढी अन्तरिक्षमा बिताउने वैज्ञानिक क्रिस्टिना कोच हुन् । उनले ३२८ दिन अन्तरिक्षमा बिताएकी छन् भने पिग्गी विटस्नले २८९ दिनसम्म अन्तरिक्षमा बिताएकी थिइन् ।
एकैपटक ३७१ दिन बिताएका फ्र्यांक रुबियो अन्तर्राष्ट्रिय स्पेस स्टेसनमा सबैभन्दा बढी समय बिताउने पुरुष अन्तरिक्षयात्री हुन् । तर, पिग्गी विटस्नले समग्रमा सबैभन्दा बढी ६७५ दिन अन्तरिक्षमा बिताएकी छन् ।
