काठमाडौं— काठमाडौंबाट २३ वर्षीया र ३६ वर्षीया महिलालाई भारतको पुणेमा लगेर बेचेको आरोपमा प्रहरीले दुई जनालाई पक्राउ गरेको छ । पक्राउ पर्नेमा नुवाकोटको दुप्चेश्वर गाउँपालिका–७ घर भएका ३२ वर्षीय मानबहादुर तामाङ र २४ वर्षीय सोमबहादुर तामाङ रहेका छन् ।
मंसिर १८ मा उनीहरुले महिलाहरुलाई दार्जिलिङ घुम्न जाने र मोबाइल किनिदिने आश्वासन दिएर झापा हुँदै इलाम लगेका थिए । त्यहाँबाट कोलकत्ता हुँदै दिल्लीमा १७ दिन राखेर पुणेमा लगेर बेचेको मानव बेचविखन ब्यूरोका एसपी नरेन्द्र कुँवरले बताए ।
भारतीय रुपैयाँ डेढ लाख र दुई लाख रुपैयाँ बेचेर उनीहरु फर्केको प्रहरीको अनुसन्धान निष्कर्ष छ । काठमाडौंबाट पक्राउ परेका मानबहादुर यसअघि पनि मानव बेचविखन मुद्दामा ५ वर्ष जेल बसेर निस्केका हुन् ।
आरोपीहरुले पीडितहरुलाई नक्कली नागरिकता समेत बनाइदिएको पाइएको छ । अर्का आरोपी संचबहादुर तामाङ डाकाचोरी मुद्दामा नख्खु कारागारमा थुनामा छन् ।
