धरान : धरानमा पिकअपबाट गाँजा तस्करी गर्ने तीनजनालाई प्रहरीले पक्राउ गरेको छ ।पक्राउ पर्नेमा पिकअप चालक धरान उपमहानगरपालिका वडा नं. २० बस्ने ३४ वर्षीय कमल राई, सहचालक धनकुटा साँगुरीगढी गाउँपालिका वडा नं. ९ बस्ने २० वर्षीय राजु विश्वकर्मा र गाडीमा सवार धरान २० बस्ने २३ वर्षीय प्रदीप राई रहेका छन् ।
जिल्ला प्रहरी कार्यालय सुनसरीका प्रवक्ता, डीएसपी रामप्रसाद तिमल्सिनाका अनुसार बुधबार धरान उपमहानगरपालिका वडा नं. २० खैरे खोलास्थित अस्थाई प्रहरी चौकी बिष्णुपादुकाबाट प्रहरी सहायक निरीक्षक दयाराम खतिवडाको कमाण्डमा खटिएको गस्ती टोलीले धनकुटाबाट धरानतर्फ आउदै गरेको को १ ज ३१५८ नम्बरको पिकअप गाडीबाट गाँजा बरामद गरेको हो ।
प्रहरीले गाडीलाई रोक्न खोज्दा तत्काल भागेको र पिछा गर्दै जाँदा एक किलोमिटर टाढा गाडी रोकेर गाडीभित्र रहेको बोरा भीरबाट फ्याल्दै गरेको अवस्थामा प्रहरीले नियन्त्रणमा लिएको हो ।
प्रहरीले घटनास्थलबाट चार बोरा गाँजा बरामद गरेको छ । उक्त गाँजाको तौल ५६ केजी चार सय ५० ग्राम रहेको छ ।पक्राउ परेका तीनै जनामाथि थप अनुसन्धान भइरहेको प्रहरीले जनाएको छ ।
