काठमाडौं– नेपालले साफ महिला च्याम्पियनसिप–२०२४ को सेमिफाइनलमा प्रवेश गरेको छ । समूह चरणको अन्तिम खेलमा श्रीलङ्कालाई ६–० गोलअन्तरले पराजित गर्दै नेपाल समूह ‘बी’को विजेता बनेको हो । अब नेपालले सेमिफाइनलमा आइतबार समूह ‘ए’को उपविजेता भारतसँग प्रतिस्पर्धा गर्नेछ ।
त्रिपुरेश्वरस्थित दशरथ रङ्गशालामा भएको खेलमा नेपालले पहिलो हाफमै ४–० को अग्रता लिएको थियो । रेखा पौडेलले दुई गोल, सावित्रा भण्डारी (साम्बा) र सविता राना मगरले एक/एक गोल गरेका थिए । दोस्रो हाफमा अमिशा कार्की र रश्मीकुमारी घिसिङले थप दुई गोल गर्दै खेल ६–० मा टुंग्याए ।
आइतबार नै बङ्गलादेश र भुटानबीच अर्को सेमिफाइनल खेल हुनेछ ।
