काठमाडौं–प्रधानमन्त्री केपी शर्मा ओलीले ‘हेर्ने कथा’ टेलिभिजन कार्यक्रममा प्रसारित भएको प्रकाश तामाङको कथाप्रति गहिरो चासो व्यक्त गरेका छन् । बाल्यकालमा काठमाडौंमा गलैंचा कारखानामा काम गर्न आएका प्रकाश वर्षौंसम्म परिवारबाट टाढा रहेर हिमालयको चुम भ्याली पुगेका थिए ।
कार्यक्रमले प्रकाशलाई उनको परिवारसँग पुनर्मिलन गराएको कथा प्रस्तुत गरेसँगै यो विषय चर्चामा रहेको छ । प्रधानमन्त्री ओलीले यो कथा हेरेर निकै भावुक भएको भन्दै प्रकाशलाई भेटेर उहाँको कुरा सुन्न चाहेको बताएका छन् ।
प्रधानमन्त्री ओलीले प्रकाशको भिडियो साझा गर्दै फेसबुकमा लेखेका छन्,
हामी दुःखको आँसुसँग मात्र परिचित छौँ। चाहे सुखका हुन् वा दुःखका, भावको आयतन शरीरले थेग्न नसकेपछि आँसु झर्ने रहेछ ।
हेर्ने कथाको पछिल्लो एपिसोड 'हराएका वर्षहरू' हेरेँ । प्रकाश तामाङ (काले मोक्तान)को परिवारसँग मिलनको दृश्यले आँसु आयो। सोचें - यस्ता कति प्रकाशहरु वर्षौंदेखि हराएका होलान्! एक पटक प्रकाशलाई भेटेर उहाँको कुरा सुन्न चाहन्छु। विद्या चापागाईं प्रभावशाली 'स्टोरी टेलर' हुनुहुन्छ । हेर्ने कथामा उहाँले प्रस्तुत गरेका अरु कयौं कथाहरू पनि हेरेको छु। विद्या चापागाईंसँग पनि भेटेर यस विषयमा कुरा गर्ने छु। यस मर्मस्पर्शी कथालाई दृश्यमा ल्याइदिएकोमा हेर्ने कथा टिमलाई धन्यवाद !!
