काठमाडौँ–पुल्चोकस्थित मन्त्री निवास अब सर्वोच्च अदालतका न्यायाधीश र मुख्य रजिस्ट्रारको आवासको रूपमा प्रयोग गर्न लागिएको छ। भैंसेपाटीमा नयाँ मन्त्री आवास बनाइएकाले, पुल्चोकमा न्यायाधीशहरूको लागि आवासको व्यवस्था गर्न लागिएको हो। भदौ मसान्तसम्म सबै मन्त्रीहरू भैंसेपाटीमा सरिसक्ने र असोजसम्म न्यायाधीशहरूलाई पुल्चोकमा स्थानान्तरण गर्ने तयारी गरिएको छ।
पुल्चोकको मन्त्री निवासलाई अब सर्वोच्च अदालतका न्यायाधीशहरूको निवासको रूपमा प्रयोग गरिने छ। मन्त्री आवास व्यवस्थापन सहरी विकास मन्त्रालयअन्तर्गत संघीय सचिवालय निर्माण तथा व्यवस्थापन कार्यालयले यो जिम्मा सम्हालिरहेको छ। कार्यालयका प्रमुख चक्रवर्ती कण्ठले, मन्त्री आवास भैंसेपाटीमा सर्नासाथ पुल्चोक आवासलाई 'स्टेट गेस्ट हाउस' बनाउने तयारी गरिएको बताए । यो निर्णय ०७९ सालको फागुन महिनामा गरिएको थियो।
पुल्चोकमा रहेका भवनहरू पुराना भएकाले मर्मत गरेर न्यायाधीशहरूको आवास बनाउन लागिएको छ। पानी चुहिने र जम्ने समस्याहरूलाई समाधान गरेर मात्रै न्यायाधीशहरूको आवास तयार पारिनेछ।
उप-रजिस्ट्रार निराजन शर्माका अनुसार, सर्वोच्च अदालत भौतिक योजना शाखाले पुल्चोक आवास व्यवस्थापनको जिम्मा लिने तयारी गरेको छ। यसअघि न्यायाधीश सपना प्रधान मल्लको अध्यक्षतामा यो पहल भएको थियो। अहिलेसम्म सर्वोच्चका न्यायाधीश र मुख्य रजिस्ट्रारलाई छुट्टै आवासको व्यवस्था थिएन। कान्तिपुर दैनिकबाट
