काठमाडौं— काभा यू-२० महिला भलिबल च्याम्पियनसिपमा नेपालले आज श्रीलंकासँग खेल्दैछ । खेल नेपाली समय अनुसार राति १० बजे मालेस्थित सोसियल सेन्टर कभर्डहलमा हुनेछ ।
नेपाली महिला उमेर समूहको टिमले पहिलो पटक काभाको उमेर समूहको प्रतियोगिता खेल्न लागेको हो । जेनिशा विकको कप्तानीमा रहेको नेपाली टोलीले बुधबार सामान्य प्रशिक्षण गरेको थियो ।
कप्तान जेनिशाले पहिलो खेल खेल्न उत्साहित रहेको बताइन् । ‘हामी प्रतियोगिताको लागि तयार छौं । श्रीलंकासँगको पहिलो खेलमा राम्रो नतिजासिपत प्रतियोगिता सुरु गर्न चाहन्छौं’, उनले भनिन् ।
यस्तै मुख्य प्रशिक्षक कुमार राई पहिलो खेल महत्वपूर्ण हुने भएकोले त्यसमा केन्द्रित हुने बताए । ‘पहिलो अन्तर्राष्ट्रिय प्रतियोगिता खेल्न हामी खेलाडीसहित सबै जना उत्साहित छौं। पहिलो खेल जितसहित प्रतियोगितामा सुरु गर्न चाहन्छौं’, उनले भने ।
नेपाली टोलीमा रहेका १२ खेलाडीसँग नै घरेलु भलिबलमा सिनियर स्तरको प्रतियोगिता खेलेको अनुभव छ । जसले गर्दा जुनियर अन्तर्राष्ट्रिय प्रतियोगिता खेल्दा त्यो अनुभवलाई सदुपयोग गर्ने योजनामा छन् ।
नेपालले दोस्रो खेल शुक्रबार कीर्गिस्तान तथा तेस्रो खेल शनिबार माल्दिभ्ससँग खेल्नेछ । सिंगल राउण्ड रोबिनको खेलपछि सेमिफाइनल हुनेछ । जहाँ लिगमा पहिलो हुनेले चौथोसँग र दोस्रो हुनेले तेस्रोसँग खेल्नेछ । सेमिफाइनल विजेताबीच फाइनल खेल हुनेछ ।
नेपाली टोलीमा सलिना बुढा मगर, जेनिशा विश्वकर्मा, एलिसा मानन्धर, निशा महर, भावना तामाङ, एन्जिला प्रधान, निशा चौधरी, आरती चौधरी, मिना सुनार, अनुषा चौधरी, स्नेहा ठगुन्ना, आशिका क्षेत्री छन् ।
