काठमाडौं । त्रिभुवन अन्तर्राष्ट्रिय विमानस्थलबाट बरामद ६० किलो ७ सय १६ ग्राम सुन प्रकरणमा थप दुईजना पक्राउ गरेको तथ्य सीआईबीले बुधवार सार्वजनिक गरेको छ । पक्राउ पर्नेमा गणेश पौडेल र किशोर बस्नेत छन् । हालसम्म सुन तस्करीमा पक्राउ पर्नेहरुको संख्या २५ पुगेको छ ।
बुधवार पक्राउ गरिएका पाल्पा घर भएका गणेश पौडेल अधिकृत हुन् । त्रिभुवन विमानस्थल भन्सार कार्यालयमा कार्यरत पौडेल र सुन तस्करबीच कनेक्सन देखिएको अनुसन्धानमा संलग्न अधिकृतहरु बताउँछन् । उनी त्रिभुवन विमानस्थल भन्सार कार्यालयको मूल्यांकन शाखामा कार्यरत थिए ।
अर्का आरोपित किशोर बस्नेत सुन तस्करीमा संलग्न मुख्य योजनाकार मध्येका दावा छिरिङका सहयोगी हुन् । सिन्धुपाल्चोक घर भएका बस्नेतले दावाको सहयोगीको रुपमा काम गर्दै आएको सीआईबीले गरेको अनुसन्धानबाट थाहा भएको छ ।
तिब्बतियन मुलका बेल्जियन नागरिक छिरिङले भने अनुसार किशोरले हङकङबाट सामान मगाउने गरेका थिए । किशोरले कार्गोमार्फत पानी तान्ने मोटर, ब्रेक प्याड, सेभिङ रेजर र स्मार्ट वाच मगाएको भेटिएको छ । अनुसन्धानमा संलग्न एकजना अधिकृतका अनुसार ती सामान भित्र उनीहरुले सुन लुकाएर ल्याउने गरेका थिए ।
साउन १४ मा दावा पक्राउ परेपछि उनि भारत भागेका थिए । भारतिय दुतावासका कन्सुलर प्रहरी बरिष्ठ उपरिक्षक उमा चतुर्वेदीसँग समन्वय गरेर उनलाई नयाँ दिल्लीबाट पक्राउ गरेर बुधवार नेपाल ल्याइएको हो । बस्नेत पक्राउसँगै सुन प्रकरणमा दावाको संलग्नताबारे थप तथ्य खुल्ने अनुसन्धानमा संलग्न अधिकृतहरु बताउँछन् 
६० किलो सुन प्रकरणमा संलग्न दावा छिरिङका मुख्य सहयोगी भनिएका किशोर बस्नेतलाई नेपाल प्रहरीको केन्द्रीय अनुसन्धान ब्युरो (सीआईबी) ले भारतबाट पक्राउ गरेको छ ।
उनलाई बुधबार काठमाडौं ल्याइएको सीआईबीका एक अधिकृतले जानकारी दिए ।
सीआईबीका अनुसार सिन्धुपाल्चोकका स्थायी बसिन्दा बस्नेतले दावाले भनेअनुसार सामान खरिद गरेर सुन लुकाएर तस्करीमा सहयोग गर्ने गरेका थिए ।
