एजेन्सी / फिलिपिन्समा नोरु समुद्री आँधी प्रभावितहरूको उद्धारका क्रममा ४ जना उद्धारकर्ताको मृत्यु भएको छ ।
२ सय ४० किलोमिटर प्रतिघण्टाको गतिमा आइरहेको आँधीले लुजोन क्षेत्रलाई अस्तव्यस्त बनाएको छ । बुलाकान प्रान्तको सानमिगल जिल्लामा ५ जना उद्धारकर्मी बेपत्ता भएको र ४ जनाको शव भेटिएको जनाइएको छ ।
राजधानी मनिलामा पनि आँधीले ब्यापक क्षति पुर्याएको छ । आँधीको बाटोमा पर्ने क्षेत्रबाट ७४ हजार मानिसलाई अन्य स्थानमा सारिएको छ । फिलिपन्सिको ११ करोड जनसंख्या मध्ये ५० प्रतिशत नोरु आँधीको चपेटामा परेको जनाइएको छ ।आँधीका कारण सोमबार स्टक मार्केट समेत बन्द गरिएको छ ।
औद्योगिक प्रतिष्ठानहरूलाई सचेत रहन भनिएको छ । हजारौं सुरक्षाकर्मी तथा स्वयंसेवकहरुलाई नदी किनार, पुल तथा संवेदनशील क्षेत्रहरूमा खटाइएको छ । ७ हजार समुद्री टापुहरु रहेको फिलिपिन्स बारम्बार समुद्री आँधीको चपेटामा पर्ने देश हो ।
