झापा / श्रीलङ्काका राष्ट्रपति गोटाबाया राजापाक्षेले बुधबार राजीनामा दिने भएका छन् । प्रदर्शनकारीले घर कब्जामा लिएपछि गए राति राष्ट्रपति राजापाक्षेले राजीनामा दिने बताएका हुन् ।
श्रीलङ्कामा आर्थिक संकट चुलिएपछि प्रदर्शनकारीले महिनौँदेखि राष्ट्रपति राजापाक्षेको राजिनामा माग गर्दै प्रदर्शन गर्दै आएका थिए ।
यसैबीच, प्रदर्शनकारीले प्रधानमन्त्री रनिल विक्रमासिंघेको कोलम्बोस्थित घरमा शनिबार आगजनी गरेका छन् । प्रदर्शनकारीलाई नियन्त्रणमा लिन सेनाले अश्रुग्यास प्रहार गरे पनि उनीहरु प्रधानमन्त्री निवासमा प्रवेश गरेका थिए ।
प्रदर्शनकारीले प्रधानमन्त्री विक्रमासिंघेको गाडीमा तोडफोड समेत गरेका थिए । मे महिनामा प्रधानमन्त्रीमा नियुक्त भएका विक्रमासिंघेले पनि सरकारको निरन्तरता र सबै नागरिकहरूको सुरक्षा सुनिश्चित गर्न पदबाट राजीनामा दिने घोषणा गरेका छन् ।
उनले ट्विटरमार्फत् पनि आफू सरकार छोड्न तयार रहेको उल्लेख गरेका छन्।
