बिर्तामोड / झापाको मेचीनगरमा जंगली हात्तीको आक्रमणबाट एक जनाको मृत्यु भएको छ भने एक जना घाइते भएका छन् ।
मृत्यु हुनेमा मेचीनगर नगरपालिका –९ स्थित पशुपति टोलका ७० वर्षीय पेना किसान रहेका छन् ।
सोमबार दिउँसो ३ः४५ बजे टिमाई खोलास्थित थोप्लेविरान सामुदायिक वनबाट निस्किएको हात्तीले बगरमा हिँडिरहेको अवस्थामा किसानमाथि आक्रमण गरेका थिए।
हात्तीको आक्रमणबाट घाइते भएका किसानलाई उपचारका लागि मेची अस्पताल भद्रपुर लगिएको थियो । उनको उपचारकै क्रममा मृत्यु भएको जिल्ला प्रहरी कार्यालय झापाका प्रहरी नायब उपरीक्षक बसन्त पाठकले जानकारी दिए ।
त्यस्तै हात्तीको आक्रमणबाट मेचीनगर –९ कै ३८ बर्षिया झुमा भन्ने बसन्ती दनुवार घाइते भएकी छिन् । हात्तीको आक्रमणबाट दनुवारको पेट र शरीरको विभिन्न भागमा चोट लागेको छ ।
दनुवारको बिर्तामोडस्थित बीएण्डसी हस्पिटलमा उपचार भइरहेको जिल्ला प्रहरी कार्यालय झापाले जनाएको छ ।
