बिर्तामोड / भारतको दक्षिणी राज्य केरलामा बाढी–पहिरोकाे कारण २४ जनाको ज्यान गएको छ।
शुक्रबारदेखि लगातार परेको वर्षाका कारण आएको बाढी–पहिरोमा परी २४ जनाको मृत्यु भएको बीबीसीले जनाएको छ ।
बिबिसीका अनुसार अहिले सम्म बाढी–पहिरोमा परी हराइरहेका दुई दर्जन शव फेला परिसकेको छ। यस राज्यका दुई जिल्ला इदुकी र कोट्याम जिल्लामा थप दुई जना हराएका छन्। उनीहरूको खोजी कार्य जारी छ।
बाढीमा परेर ज्यान गुमाएकामध्ये पाँच जना बालबालिका रहेका छन् । साथै दर्जन बढी बेपत्ता भएको अनुमान छ । बाढीका कारण यहाँको बाटो र बिजुली अवरुद्ध भएका कारण उद्धार गर्न निकै कठिन भएको बताइएको छ।
त्यस्तै १८४ वटा उद्धार शिविर बनाएर ती ठाउँका करिब आठ हजार मानिसलाई राखिएको छ। उनीहरूलाई खाना, आवास र उपचार सुविधा उपलब्ध गराइएको बताइएको छ ।
