बिर्तामोड / सरकारले नेकपा एमालेको माधव नेपाल समुहलाई पार्टी विभाजनका लागि सहज बनाइदिन ल्याएको अध्यादेशको सत्तारुढ दल नेपाली कांग्रेस भित्रैबाट विरोध सुरु भएको छ ।
नेपाली कांग्रेसका प्रभावशाली नेता डा. शेखर कोइरालाले सरकारले ल्याएको राजनीतिक दल विभाजन सम्बन्धी अध्यादेशको विरोध गरेका हुन् ।
कांग्रेस सभापति समेत रहेको शेर बहादुर देउवा नेतृत्वको आज बालुवाटारमा बसेको मन्त्रिपरिषद् बैठकले दल विभाजन सम्बन्धी अध्यादेश ल्याउने निर्णय गरेको थियो । अध्यादेश जारीका लागि सरकारले राष्ट्रपतिकोमा पठाएको छ ।
आफ्नै दलको नेतृत्वमा बनेको सरकार सञ्चालनलाई सहज बनाउनकै लागि देउवाले अध्यादेश ल्याएको भएपनि अध्यादेशबाट मुलुक चलाउन नहुने भन्दै नेता कोइरालाले विरोध गरेका हुन् ।
अध्यादेश प्रति असन्तुष्टि व्यक्त गर्दै कोइरालाले सामाजिक सञ्जाल ट्विटर मार्फत भनेका छन् – ‘सरकार सञ्चालनको सुविधाको लागि राजनीतिक दल सम्बन्धी अध्यादेश ल्याइएको हुन सक्छ तर अध्यादेशबाट राजकाज चलाउने सोचको समर्थन गर्न सकिन्न । सरकारले संसदबाट परिमार्जन र सुधारसहित बजेट पास गर्ने तर्फ सकृयता देखाउनुपर्थ्यो तर यो गल्ती प्रधानमन्त्रीबाट भयो, यो कांग्रेसको संस्कार होइन।’
