बुटबल / माओवादी केन्द्रका नेता कुलप्रसाद केसी (सोनाम) लुम्बिनी प्रदेशको मुख्यमन्त्रीमा नियुक्त हुने भएका छन् । प्रदेश सभाको स्पष्ट बहुमत प्राप्त गरेपछि केसीलाई प्रदेश प्रमुख अमिक शेरचनले मुख्यमन्त्रीमा नियुक्त गर्न लागेका हुन् ।
केसीलाई मुख्यमन्त्रीमा दाबी गर्दै चार दलीय गठबन्धनले ४२ जना सांसदको हस्ताक्षर प्रदेश प्रमुख अमिक शेरचनलाई बुझाएको थियो ।
गठबन्धनका संयोजक एवम् कांग्रेस संसदीय दलका नेता विरेन्द्र कनोडियाले कुलप्रसाद केसी (सोनाम)लाई ४२ जना सांसदको समर्थन रहेको भन्दै प्रदेश प्रमुख शेरचनलाई हस्ताक्षर बुझाएका हुन् ।
केसी मुख्यमन्त्रीमा नियुक्त भएपछि आजै सपथ ग्रहण गरेर सानो आकारको मन्त्रिपरिषद् गठन गर्ने केसीको तयारी छ ।
अल्पमतमा परेपछि एमाले नेता शंकर पोखरेलले बुधबार मुख्यमन्त्री पदबाट राजीनामा दिएका थिए । लुम्बिनी प्रदेशमा कांग्रेस र माओवादी केन्द्रबीच आठ–आठ महिना सरकारको नेतृत्व गर्ने सहमति भएको छ ।
