बिर्तामोड / संघीय सरकारको राज्यमन्त्रीमा नियुक्त भए लगत्तै विवाद र आलोचनमा तानिएका उमेश श्रेष्ठले घरजग्गा तथा दम्पती कर नतिरेको सार्वजनिक भएको छ । स्थानीय सरकारको पटक–पटकको ताकेता वेवास्ता गर्दै श्रेष्ठ सञ्चालक रहेको जनमैत्री अस्पतालले कर नतिरेको सार्वजनिक भएको हो ।
श्रेष्ठ राज्यमन्त्री बने लगत्तै उनको नियुक्तिको विषयलाई लिएर विवाद भइरहेको छ । ललितपुरको गोदावरीमा रहेको योगेन्द्र बहादुर विष्ट परिवारको ४०० रोपनी जग्गा हत्याएको समेत आरोप लागेका बेला उनले कर समेत तिर्न अटेरी गरेको सार्वजनिक भएको हो ।
काठमाण्डौ महानगरपालिकाले कर नतिरेको भन्दै श्रेष्ठ सहित ५२ फर्म तथा व्यक्तिका नाममा सार्वजनिक सूचना नै जारी गरेर तीस गते भित्र कर नतिरे कानुनबमोजिम कारवाही थाल्ने चेतावनी दिएको हो ।
महानगरपालिकाले सार्वजनिक गरेको कर नतिर्नेको सुचीमा सञ्चार उद्यमी तथा देशकै ठूला उध्योगिका रुपमा चिनिएका विवादास्पद छविका अजयेराज सुमार्गिको परिवार समेत रहेको छ । सुमार्गी थाहा संचारगृहका सञ्चालक समेत हुन् । आफ्नो कारोबारको केही हिस्सा आफ्नी सासुको नाममा समेत राख्ने गरेका उनको सासु शिशु अर्याल र आफ्नो नाममा रहेको अल इन मार्टले कर नतिरेको महानगरपालिकाले जनाएको छ ।
त्यसैगरी अर्का सञ्चार उद्यमी तथा चर्चित पत्रकार रवि लामिछानेकी श्रीमती निकिता पौडेलको परिवारको स्वामित्वमा रहेको गोपीकृष्ण मुभिजले समेत महानगरपालिकालाई कर तिरेको छैन ।
संघीय सरकारको स्वामित्वमा रहेको खाद्य संस्थानले समेत कर नतिरेको महानगरपालिकाले जनाएको छ ।
महानगरपालिकाले जारी गरेको सार्वजनिक सूचनामा कर तिर्न आनाकानी गरेकाले तिस दिन भित्र कर नतिरे कानुन बमोजिम सम्पती रोक्का र सरकारी सेवा बन्द गर्ने सम्मका कारवाही गरिने चेतावनी दिइएको छ ।
कर नतिर्नेको सुचीमा कान्तिपुर डेन्टल हस्पिटल, सिग्नेचर अपार्टमेन्ट, सिध्दार्थ बनस्थली स्कूल, रञ्जना ट्रेड, बरुण बेभरेज, रिध्दिसिद्धि डेभलपर्स, सिटी सेन्टर, मैतिदेवी प्लाजा, चेम्बर भवन र बैशाली होटल रहेका छन् ।
त्यसैगरी होटल मर्स्याङदी, होटल प्लाटिनम, होटल ग्याङजोङ, केएल टावर, कम्प्युटर बजार, पिपुल्स प्लाजा, बैशाली होटल, सिग्नेचर अपार्टमेन्ट र मुस्ताङ्गे राजा झिग्मे सिङमे पर्वल बिष्टलगायतले समेत कर नतिरेको काठमाण्डौ महानगरपालिकाले जनाएको छ ।
