काठमाडौँ / नेकपा (एमाले)ले प्रधानमन्त्री
शेरबहादुर देउवालाई विश्वासको मत दिने २२ सांसदलाई स्पष्टीकरण सोध्ने निर्णय गरेको
छ । ललितपुरस्थित तुल्सीलाल स्मृति प्रतिष्ठानमा जारी १०औँ केन्द्रीय कमिटी बैठकले
प्रधानमन्त्रीलाई विश्वासको मत दिने वरिष्ठ नेता माधवकुमार नेपाल सहितका
सांसदलाई कारवाही गर्ने जनाएको हो ।
एमालेका प्रवक्ता प्रदीपकुमार ज्ञवालीले वरिष्ठ
नेता नेपाल सहितका सांसदले पार्टी विधिविधान र निर्णय विरुद्ध प्रधानमन्त्रीलाई
मतदान गरेकाले स्पष्टीकरण सोधिएको जानकारी दिएका छन् । आइतबार प्रधानमन्त्रीले
विश्वासको मत प्राप्त गर्दा एमालेका २२ सांसदले पार्टी निर्णयविरुद्ध विश्वासका
पक्षमा मतदान गरेका थिए। बैठकले स्पष्टीकरण २४ घण्टाभित्र पेश गर्न भनिएको छ ।
स्पष्टीकरणका आधारमा कारवाही प्रक्रियाबारे निर्णय हुने उनले बताएका छन् ।
“हामीले हिजो संसद्मा भएको समग्र
घटनाक्रमलाई नेपालले हासिल गरेका अग्रगतिका प्रयासमाथि एक खालको धक्काका रुपमा
लिएका छौँ”, उनि भन्छन्,
“पार्टीका केही सांसदहरुले पार्टी निर्णयको अवज्ञा गर्दै फ्लोरक्रस
गर्ने र प्रधानमन्त्री देउवालाई विश्वासको मत दिने जुन काम गर्नुभयो । पार्टी
अनुशासनको दृष्टिले र कम्युनिष्ट आन्दोलन, जनताको भावनाका
सबै दृष्टिले सर्वथा अनुचित, अनुशासनहिन र
गलत कार्य भनेको छ ।”
दश बुँदे सहमतिलाई स्थायी कमिटी बैठकले गरेको अनुमोदनलाई
आज बसेको बैठकले पनि अनुमोदन गरेको छ। उनले १० बुँदे सहमति अनुसार नै पार्टीलाई
एकताबद्ध बनाउने निर्णयसमेत बैठकले गरेको बताएका छन् । “दश
बुँदे अर्को पार्टीलाई मत दिऔँ, पार्टीको निर्णय
अवज्ञा नगर भनेको छैन”, उनि भन्छन् ,
“१० बुँदेले पार्टीलाई एकताबद्ध बनाउने हो । उहाँहरुले संसद्मा हिजो
जे गर्नुभयो त्यो गलत हो ।”
बैठकलाई सम्बोधन गर्दै अध्यक्ष केपी शर्मा
ओलीले पछिल्लो राजनीतिक घटनाक्रम बारे आफ्नो अभिव्यक्ति राखेका थिए । उनले हिजो
प्रधानमन्त्री शेरबहादुर देउवालाई विश्वास मत लिने क्रममा संसद्मा देखिएको
परिदृश्य र त्यसले पार्टीको जीवनमा पारेको प्रभावबारे चर्चा गरेको पार्टी प्रवक्ता
ज्ञवालीले जानकारी दिएका छन् ।
असार २७ गते गरिएको १० बुँदे सहमतिका आधारमा नै
आजको बैठक बसेको उनको भनाइ थियो । विसं २०७५ जेठ २ गतेपछिको निरन्तर अहिलेको बैठक
भएको उनले बताएका छन् । जेठ २ गते नवौँ बैठक डाकिएको थियो। उनले पार्टीभित्र
विभिन्न समस्या उत्पन्न र विमति हुने जनाउँदै पार्टीका उपाध्यक्ष भीमबहादुर रावलले
सांसद पदबाट राजीनामा दिन नहुने भनाइ राखेका छन् । प्रवक्ता ज्ञवालीका अनुसार बैठक भोलि ३ बजे
फेरि बस्नेछ ।
