काठमाडौं
/ नेपाली कांग्रेसको आसन्न महाधिवेशनमा कोइराला खेमा एकजुट हुने भएको छ । महाधिवेशनमा
कोईराला परिवारबाट सर्वसम्मत उम्मेदवार चयन गर्न छलफल शुरु भएको हो।
१४
औं महाधिवेशनमा कोइराला परिवारबाट महामन्त्री डा. शशांक कोइराला र केन्द्रीय सदस्य
डा. शेखर कोइरालाले नेतृत्वमा दावी गर्दै उम्मेद्वारी दिने तीव्र तयारी गरेका छन्
। कांग्रेस केन्द्रीय सदस्य सुजाता कोइरालाले पनि नेताहरुबीच सहमति नभए आफू
नेतृत्वमा दावी गर्ने बताउँदै आएकी छन् ।
कोइराला
परिवारका यी तीन जना नै एकजुट नहुने अवस्था आएपछि परिवारबाट एक जना मात्रै
नेतृत्वमा उठ्ने गरी सहमतिको प्रयास शुरु भएको हो । शनिबार दिउँसो शशांक निवास महाराजगञ्जमा शेखर, शशांक
र सुजाताबीच बैठक भएको छ ।
कांग्रेसमा
संस्थापनइतर समूहबाट सभापतिका आधा दर्जन बढि आकांक्षी देखिएका छन् । तर, कोइराला
परिवार भित्रबाटै शेखर र शशांकले सभापतिका लागि बलियो उम्मेदवारका रुपमा प्रस्तुत
गर्दै आएका छन् ।
महामन्त्री
शेखर कोइरालाले आफूहरुबीच सहमतिमा एउटा मात्रै उम्मेदवार बन्ने बताउँदै आएका छन् ।
उनले आफू कुनै पनि हालतमा पछि नहट्ने अडान लिँदै आएका छन् । १४ औं महाधिवेशनमा
नेतृत्वका लागि दोहोरिन कांग्रेस सभापति शेरबहादुर देउवाले तयारी अगाडि बढाइसकेका
छन् ।
संस्थापन
समूहबाट उपसभापति विमलेन्द्र निधिले पनि सभापतिमा उम्मेदवारी दिने घोषणा गरिसकेका
छन् । तर संस्थापन समूहबाट निधिका पक्षमा अरु नेताहरु खुलेका छैनन् ।
यसअघि उपसभापति निधिकै पहलमा महामन्त्री कोइराला र पूर्वमहामन्त्री प्रकाशमान सिंहबीच तीन पटक छलफल भएको थियो । कांग्रेस संस्थापक नेताहरु वीपी कोइराला, महेन्द्रनारायण निधि र गणेशमान सिंहका पुत्र नेतात्रयबीच सर्वसम्मत उम्मेदवार तय गर्न आलोपालो तीनै नेताका निवासमा छलफल भएको थियो । तर, उनीहरुबीच नेतृत्वमा सहमति हुन सकेको छैन।
