बर्दिवास / बर्दिवासमा ज्यान मार्ने अभियोग लागेका एक व्यक्ति पक्राउ परेका छन् । पक्राउ पर्नेमा रामगोपालपुर नगरपालिका–४ का शत्रुधन राय यादव रहेको इलाका प्रहरी कार्यालय बर्दिवासले जानकारी दिएको छ।
अभियुक्त घटनाको छ महिनापछि पक्राउ परेका हुन् । गत पुस २२ गते बर्दिवास–१ स्थित नेहा खाद्य उद्योगमा कार्यरत कामदार रामधारी चौधरीलाई छुरा हानेर भागेका यादवलाई शुक्रबार (आज) पक्राउ गरिएको प्रहरीले जानकारी दिएको छ।
छुरा प्रहारबाट गम्भीर घाइते भएका सर्लाहीको लालबन्दी–३ का स्थायी बासिन्दा चौधरी लामो समयको उपचारपछि निको भएका छन् । यादवले व्यक्तिगत रिसइबीले चौधरीलाई छुरा प्रहार गरेको खुलेको प्रहरी अनुसन्धानले देखाएको प्रहरी निरीक्षक बलिष्टर सिंहले बताएका छन् ।
