काठमाडौँ / हिमाली नवीन समाजले हुम्लाका नौ जना बालबालिकाको उद्धार गरि परिवारलाई जिम्मा लगाएको छ ।
लामो समयदेखि बालबालिकाको क्षेत्रमा काम गर्दै आएको समाजले आइतबार प्रमुख जिल्ला अधिकारी र स्थानीय जनप्रतिनिधिको रोहबरमा राम्रो शिक्षा दिने प्रलोभनमा पारेर काठमाडौँ लगिएका खार्पुनाथ र आदानचुली गाउँपालिका बालबालिकालाई परिवारको जिम्मा लगाएको हो ।
आवासीय बालगृह सञ्चालन तथा व्यवस्थापनसम्बन्धी मापदण्ड, २०६९ विपरीत सञ्चालन रहेको हुँदा गत फागुन १९ गते काठमाडौँको तारकेश्वर नगरपालिका –६ मा रहेको धर्मस्थलीस्थित लाइट फर नेशनल बालगृहबाट उनीहरूलाई उद्धार गरिएको हो ।
राष्ट्रिय बाल अधिकार परिषद्, तारकेश्वर नगरपालिका, बालबालिका खोजतलास तथा समन्वय केन्द्र १०४ र प्रहरी चौकी धर्मस्थलीको संयुक्त टोलीले नौ जना बालबालिकालाई जोखिमपूर्ण अवस्थाबाट उद्धार गरेको हो ।
निःशुल्क गुणस्तरीय शिक्षाको बहानामा हुम्लाका विभिन्न गाउँबाट बर्सेनि धेरै बालबालिकाको बालगृहमा ओसारपसार हुने गरेको छ । बालबालिका र उनीहरूका अभिभावकलाई अनावश्यक प्रलोभन देखाई बालगृहमा भर्ना गर्ने प्रचलन बढेकाले सम्बन्धित निकायले यस सम्बन्धमा चासो दिनुपर्ने हिमाली नवीन संस्थाका प्रतिनिधि प्रभजन शाहीले बताए ।
बालगृहले पछिल्लो समय बालबालिकालाई निःशुल्क पढ्न, लेख्न र बस्न दिने प्रलोभन देखाई बालगृहमा राखेर जबरजस्ती धर्म परिवर्तन गराउने र अभिभावकहरुबाट समेत रकम असुल गरेको देखिएको छ । आफ्ना दुई बच्चालाई कक्षा १२ सम्म पढाइदिन्छु भनेर आफूबाट एक लाख रुपैयाँ लिएको अदनचुली –६ निवासी लालबहादुर शाहीले गुनासो पोखे ।
