काठमाडौं। नाइजेरियामा सशस्त्र आतंककारीहरुले शुक्रबार जाफ्नाको एक सरकारी विद्यालयमा आक्रमण गरी ३ सयभन्दा बढी बालिकाको अपहरण गरेका छन् ।
गैरइस्लामिक शिक्षा दिइएको भन्दै आक्रोशित बोको हरामका आतंककारीहरुले यहाँका विद्यालयहरुमा लगातार आक्रमण गरिरहेका छन्। केही परिवारले वरपरका जंगलहरूमा आफ्ना छोराछोरीहरूलाई खोजिरहेका छन्।
यसैबीच सेनाले पनि खोजी कार्य सुरु गरेको छ । जफ्ना राज्यका सूचना आयुक्त सुलेमान तानु अनाकाले बताएअनुसार सशस्त्र आतंककारीहरूले कति बालिकालाई अपहरण गरेका छन् भन्ने कुरा अहिलेसम्म स्पष्ट गरिएको छैन। तर, यो संख्या ३ सयभन्दा बढी रहेको स्थानीय सञ्चारमाध्यमले दाबी गरिरहेका छन् । यी मध्ये अधिकांश बालिकाहरू १२ देखि १५ वर्षका छन्।
घटना जाफ्नाको सरकारी गर्ल्स सेकेन्डरी स्कूलमा भएको हो। सो स्कुलमा पढाउने एक जना शिक्षकले बताएअनुसार घटनाका बेला बालबालिकाहरु कक्षामा पढिरहेका थिए । त्यही बेला दर्जनौं आतंककारीहरू हतियार लिएर स्कूल आए र बालिकाहरुलाई लिएर गए ।
आक्रमणकारीहरु सेनाको पोसाकमा ठूलो संख्यामा पुगेका थिए। मिडिया रिपोर्टका अनुसार यस विद्यालयमा ४ सय २१ बालिका अध्ययनरत छन् । जसमध्ये ५५ जना सुरक्षित छन् ।
