न्यूयोर्क । विश्वकै सबैभन्दा धेरै सब्सक्राइबर भएका युट्युबर मिस्टरबिस्ट (जिम्मी डोनाल्डसन)ले आफ्नी प्रेमिका थिया बुयसेनसँग विवाह गरेका छन् ।
उनीहरूको विवाह ब्रिटिस भर्जिन आइल्यान्ड्सस्थित सर रिचर्ड ब्रान्सनको निजी टापु नेकर आइल्याण्डमा निकै गोप्य र पारिवारिक वातावरणमा सम्पन्न भएको हो ।
२८ वर्षीय मिस्टरबिस्टले आफ्नो विवाहलाई सामाजिक सञ्जाल र युट्युबबाट टाढै राख्ने निर्णय गरेका थिए । विवाह समारोहमा नजिकका परिवारका सदस्य र साथीभाइ गरेर करिब ७० जना मात्र सहभागी थिए । विवाहको कुनै पनि भाग लाइभ स्ट्रिम गरिएन र युट्युबका लागि भिडियो पनि खिचिएन । समारोहको सम्झनाका लागि केवल एक पेशेवर विवाह फोटोग्राफरको व्यवस्था गरिएको थियो ।
विवाहअघि पाहुनाहरूले नेकर आइल्याण्डमा केही दिन बिताएका थिए । उनीहरूले काइटसर्फिङ, स्नोर्कलिङ तथा टापुको प्राकृतिक सौन्दर्यको अवलोकन गर्दै समय बिताए। त्यसपछि परिवारका एक निकट मित्रले दुवैजनालाई वैवाहिक बन्धनमा बाँधेका थिए । दक्षिण अफ्रिकी गेमर, लेखिका तथा कन्टेन्ट क्रिएटर थिया बुयसेनले विशेष रूपमा तयार गरिएको निकोल र फेलिसिया कुट्योरले तयार पारेको विवाह पोशाक लगाएकी थिइन् । मिस्टरबिस्ट भने राल्फ लरेनको क्लासिक टक्सिडोमा देखिएका थिए ।
मिस्टरबिस्ट र थियाको पहिलो भेट सन् २०२२ मा दक्षिण अफ्रिकामा एक कमन फ्रेन्डमार्फत भएको थियो । त्यतिबेला मिस्टरबिस्ट त्यहाँ भ्रमणमा गएका थिए । दक्षिण अफ्रिकाबाट अमेरिका फर्किएपछि उनले एक्समार्फत थियालाई सन्देश पठाएका थिए र त्यसपछि उनीहरूको लामो दूरीको प्रेम सम्बन्ध सुरु भएको थियो ।
मिस्टरबिस्टले सन् २०२४ को क्रिसमसमा दुवै परिवारको उपस्थितिमा थियालाई विवाह प्रस्ताव गरेका थिए । इन्गेजमेन्टपछि नै मिस्टरबिस्टले आफ्नो विवाह अत्यन्त निजी राख्ने इच्छा व्यक्त गरेका थिए । उनले त्यसबेला भनेका थिए, ‘यो समारोह परिवार र नजिकका साथीभाइबीच मात्रै हुनेछ । केही समय सामाजिक सञ्जालबाट टाढा बसेर सबैसँग रमाइलो गर्न चाहन्छु ।'
