विश्वका विवाहित महिलाहरूको प्रतिष्ठित अन्तर्राष्ट्रिय सौन्दर्य प्रतियोगिता मिसेस वर्ल्ड-२०२६ मा नेपालबाट सञ्जु भट्टले प्रतिनिधित्व गर्ने भएकी छन् । प्रतियोगिता आगामी जनवरी २२ देखि ३० सम्म संयुक्त राज्य अमेरिकाको लस भेगास मा आयोजना हुनेछ ।
आयोजक संस्था रिबन इन्टरटेन्मेन्टका अनुसार मिसेस नेपाल वर्ल्ड २०२५ की विजेता रक्षा पन्त व्यक्तिगत तथा व्यावसायिक प्रतिबद्धताका कारण प्रतियोगितामा सहभागी हुन नसक्ने भएपछि उनको स्थानमा सञ्जु भट्टलाई नेपालको प्रतिनिधिका रूपमा चयन गरिएको हो ।
उनको आत्मविश्वास, व्यक्तित्व, सामाजिक चेतना तथा अन्तर्राष्ट्रिय मञ्चमा नेपालको पहिचान प्रस्तुत गर्ने क्षमताका आधारमा मिसेस वर्ल्डका लागि छनोट गरिएको आयोजकले जनाएको छ ।
सञ्जु भट्ट रिबन इन्टरटेन्मेन्ट प्रालिद्वारा केहीअघि राजधानीमा सम्पन्न मिसेस नेपाल वर्ल्ड २०२५ प्रतियोगितामा मिसेस नेपाल इन्टरनेशनल २०२५ को उपाधि विजेता भएकी थिइन् ।
यसअघि नेपालबाट पृथिविया थापा र दीक्षा केसीले मिसेस वर्ल्डमा सहभागिता जनाइसकेका छन् । यस पटक सञ्जु भट्टले अन्तर्राष्ट्रिय मञ्चमा नेपालको पहिचान थप मजबुत बनाउने अपेक्षा आयोजकले व्यक्त गरेका छन् ।
