काठमाडौं – हालै देशभर बाढी र पहिरोका घटनाले निम्त्याएको जनधनको क्षति र आपत्कालिन व्यवस्थापनको अवस्थाबारे सार्वजनिक नीति तथा प्रत्यायोजित विधायन समितिको २८३ औँ बैठकले गम्भीर चासो व्यक्त गरेको छ ।
बिहीबार बसेको उक्त बैठकमा सांसदहरूले उद्धार, राहत र पुनस्र्थापनाको काममा सरकार तथा स्थानीय तहको उदासिनता रहेको भन्दै गृहमन्त्रीलाई समितिमा नै बोलाएर विस्तृत छलफल गर्नुपर्ने माग गरेका छन् ।
कांग्रेसका सांसद युवराज शर्माले भोटेकोशी क्षेत्रमा अत्यधिक वर्षाको कारण आएको बाढीबारे प्रष्ट जानकारी लिनु आवश्यक रहेको धारणा राखे । उनले भने, ‘बाढीपछिको राहत, उद्धार र पुनस्र्थापनामा हामीले लापरवाही गरिरहेका छौं । भोटेकोशीमा अति वर्षा भएर बाढी आएको हो कि हिमताल फुटेको हो, त्यसको यथार्थ पत्ता लगाएर सरकार र स्थानीय निकाय सबैले सक्रिय हुनुपर्ने अवस्था छ ।’
शर्माले बाढीको प्रकृति र स्रोतबारे वैज्ञानिक अध्ययन गरी त्यसको आधारमा नीति निर्माण र व्यवस्थापन गर्नुपर्नेमा जोड दिए । साथै उनले गृहमन्त्रीलाई समितिमा उपस्थित गराई छलफल गर्नुपर्ने प्रस्ताव समेत गरे ।
यसैबीच, समितिका सचिव सञ्जय दाहालले २४ गते रसुवामा आएको बाढीले ठूलो धनजनको क्षति पुर्याएको जानकारी दिए । ‘अहिले घाइतेको उपचारमा समस्या छ, सडक, विद्युत र सञ्चार सम्पर्क पूर्णरूपमा अवरुद्ध छ,’ उनले भने,‘विकट भूगोलका कारण राहत पनि पुग्न सकेको छैन । प्रमुख जिल्ला अधिकारीले बारम्बार हेभी उपकरण माग गर्दा पनि हालसम्म त्यसको आपूर्ति हुन सकेको छैन ।’
समितिले सरकारलाई बाढी प्रभावित क्षेत्रको तत्काल उद्धार, उपचार, पुनस्र्थापना र आवश्यक उपकरणको व्यवस्था गर्न सरकारलाई आग्रह समेत गरेको छ ।
