काठमाडौं । सिमोस सुनुवारको निर्देशनमा निर्माण भएको फिल्म ‘जन्ते बाख्रो’को पहिलो गीत ‘घामै राजा’ सार्वजनिक गरिएको छ । बिहीबार राजधानीमा आयोजित एक कार्यक्रमका बीच संगीतकार बाबुल गिरीको शब्द रचना, संगीत तथा स्वर रहेको गीतमा फिल्मका मुख्य कलाकार सौगात मल्ल र गरिमा शर्मा रोमान्टिक अवतारमा प्रस्तुत छन् ।
गीतको अन्तिममा अभिनेता आशिफ शाहलाई पनि सप्र्राइजको रुपमा देखाइएको छ । आगामी जेठ ९ गतेबाट फिल्म देशभर रिलिज हुनेछ । यसअघि फिल्मको फस्टलुक सार्वजनिक गर्दै जेठ २३ गतेलाई प्रदर्शन मिति घोषणा गरिएको फिल्म अब जेठ ९ गतेबाट प्रदर्शनमा आउने जानकारी फिल्मको गीत रिलिज कार्यक्रममा गराइयो ।
निर्माण सन्तोष गौतमले फिल्मका मुख्य अभिनेता सौगात मल्लको मुख्य भूमिका रहेको फिल्म ‘भाईरल गोर्खे’ अर्को हप्ता नै प्रदर्शन आउने भएकाले टाइम ग्यापको लागि दुई हप्ता प्रि–पोण्ड गरिएको बताए ।
निर्देशक सिमोस सुनुवारले पनि आफ्ना अघिल्ला फिल्मको गल्ती कमजोरी ‘जन्ते बाख्रो’मा सुधार गर्दै दर्शकमाझ एउटा राम्रो फिल्म पस्किने तयारी गरेको बताए । यो फिल्मका लागि कलाकारदेखि कथा लेखनसम्म आफ्नो टिमले निकै मेहनत गरेकाले दर्शकलाई जन्ते बाख्रो मन पर्नेमा विश्वस्त देखिए ।
फिल्मकी मुख्य अभिनेत्री गरिमा शर्माले आफु पहिलो पटक फिल्म मुख्य भूमिकामा देखिएकाले स्टेज चढ्दा डर लागेको बताइन् । फिल्ममा सौगात, आशिफ र गरिमासँगै रमा थपलिया, लोकेन्द्र लेखक, कमल देवकोटा, विशाल पहाडी, रुशा न्यौपाने, कुसुम शर्मा, स्नेहा जोशी, समापिका गौतम, कुशल गजमेर लगायतका कलाकारहरुको अभिनय छ ।
मुईन इन्टरटेनमेन्टको प्रस्तुति रहने ‘जन्ते बाख्रो’ सामाजिक कमेडी कथावस्तुमा निर्माण भएको छ । प्रदीप भारद्धाजको कथा, पटकथा र संवाद लेखन रहेको फिल्मको निर्माता सन्तोष गौतम हुन् ।
फिल्ममा हरि हुँमागाईको डिओपी, उत्तम हुँमागाईको सिनेमाटोग्राफी, सुनिल शिवभक्तिको सम्पादन र रोयल भिमसेन (ट्राइडेन्ट कन्सेप्ट टिम)को पोस्टर डिजाइन रहेको छ । टिफल्क फिल्मस्ले वितरण गर्ने फिल्मको डिजिटल राइट्स जी टु वान डिजिटलले खरिद गरेको छ।
