काठमाडौं । दीपक लम्सालको लगानीमा फिल्म ‘हे माया’ निर्माण हुने भएको छ । आगामी जेठबाट फिल्मको छायांकन तयारीसहित यो फिल्मको निर्माण घोषणा गरिएको हो ।
फिल्मका लागि अहिलेसम्म धेरै कलाकारसँग मौखिक सहमती भैसकेपनि लिखित सम्झौता हुन बाँकी रहेकाले केही समयपछि कलाकार सार्वजनिक गर्ने निर्माता दीपकले बताए । लम्साल लामो समयदेखि भारतको मुम्बईमा बसेर बलिउड र दक्षिण भारतीय सिनेमाको नेपाल रिलिजको चाँजोपाजो मिलाउँदै आइरहेका छन् । उनले बलिउड फिल्म नेपाल रिलिजमा लामो समय काम गरेपछि पहिलो पटक नेपाली फिल्म निर्माणमा हात हाल्न लागेका हुन् ।
रियल इन्टरटेनमेन्ट प्रालीको ब्यानरमा निर्माण हुने फिल्ममा जुनिम गहतराजको निर्देशन रहनेछ । जुनिमले निर्माण तथा निर्देशन गरेको फिल्म ‘ताण्डवम्’ हालै प्रदर्शनमा आएको थियो । ‘ताण्डवम’मा जुनिमको निर्देशकिय क्षमता हेरेर नै आफ्नो फिल्म निर्देशनमा जिम्मेवारी सुम्पेको निर्माता लम्सालले बताए ।
फिल्मको पटकथा तथा संवाद चक्रपाणी सांखीले लेखिरहेका छन् ।
