काठमाडौं— त्रिभुवन विश्वविद्यालयका उपकुलपति प्राडा केशरजंग बरालले राजीनामा दिएको विषयमा शिक्षा, विज्ञान तथा प्रविधि मन्त्री विद्या भट्टराईले आफू जानकार नरहेको बताएकी छन् ।
सिंहदरबारमा आइतबार बसेको शिक्षा, स्वास्थ्य तथा सूचना प्रविधि समितिको बैठकमा सांसदहरूले उठाएका प्रश्नमा राजीनामाको विषयमा आफू जानकार नरहेको बताएकी हुन् । शनिबार बिदा परेकाले राजीनामा दिएको विषयमा जानकारी नआएको र आज आउन सक्ने बताइन् ।
आफुले समेत सञ्चारमाध्यमबाट नै राजीनामाको दिएको बारे थाहा पाएको उनको भनाइ थियो । किन राजीनामा दिनुभएको हो भन्नेबारेमा औपचारिक जानकारी नरहेकाले औपचारिक तवरबाट जानकारी पाएपछि मात्रै समितिलाई जानकारी गराउने उनको भनाइ थियो ।
अहिले अनौपचारिक रूपमा आफूले पनि जानकारी पाएको बताउँदै विश्वविद्यालयबाट औपचारिक रूपमा जानकारी पाएपछि समितिलाई जानकारी गराउने बताइन् ।
उपकुलपति बरालले स्वास्थ्य अवस्थाको कारण देखाउँदै पदबाट राजीनामा दिएका हुन् ।
