काठमाडौं— त्रिभुवन विश्वविद्यालयको केन्द्रीय क्याम्पसको स्वतन्त्र विद्यार्थी युनियन निर्वाचन १८ गते हुने भएको छ । त्रिवि स्ववियु निर्वाचन समितिले आइतबार एक सूचना जारी गर्दै निर्वाचन १८ गते सोमबार हुने जानकारी गराएको हो ।
सर्वोच्च अदालतले पाटन उच्च अदालतले निर्वाचन रोक्न दिएको अल्पकालीन अन्तरिम आदेशलाई निरन्तरता दिनु नपर्ने फैसला गरेपछि निर्वाचनको मिति तय गरिएको हो । यसअघि चैत ५ गते विवादको कारण निर्वाचन हुन सकेको थिएन ।
त्रिभुवन विश्वविद्यालयका उपकुपति केशरजंग बरालले राजनीतिक दबाबका कारण राजीनामा दिएका छन् । दलीय प्राध्यापकहरूको अनुचित दबाब झेल्न नसकेपछि राजीनामा दिएको त्रिवि स्रोतको दाबी छ । दलीय प्राध्यापकहरूले व्यक्तिगत फाइदाका लागि अनेकन माग राख्ने र उपकुपतिमाथि दबाब दिने गरेको आरोप छ । उनीहरूको माग पूरा गर्न नसक्ने भन्दै उपकुलपति बरालले अडान राख्ने गरेका थिए ।
उक्त अडानमा कुलपति तथा प्रधानमन्त्री केपी ओलीबाट पनि असहयोग भएपछि बराल राजीनामा दिन बाध्य भएको स्रोतको दाबी छ । स्रोतका अनुसार बरालले छानेका रजिष्ट्रार केदार रिजाल र रेक्टर खड्ग केसीले पनि महत्वपूर्ण निर्णयमा असहयोग गर्न थालेका थिए । एमाले र कांग्रेसको गठबन्धन बनेपछि रेक्टर केसी र रजिष्ट्रार रिजालको एउटा टीम बनेको थियो । उक्त टीम बनेपछि उपकुलपति बराल एक्लो भएका थिए । बराललाई तत्कालीन प्रधानमन्त्री पुष्पकमल दाहाल प्रचण्डले नियुक्त गरेको भन्दै एमाले र कांग्रेसनिकट प्राध्यापकहरूले अस्वाभाविक दबाब दिने गरेका थिए ।
