काठमाडौं— कानुन व्यवसायीहरूको छाता सङ्गठन नेपाल बार एसोसिएसनको आसन्न केन्द्रीय कार्यसमिति निर्वाचनको नामावली विवाद सुल्झाउन आन्दोलनरत पक्ष र निर्वाचन समितिबिच वार्ता सुरु भएको छ ।
नेपाली कांग्रेस निकट डेमोक्रेटिक लयर्स एसोसिएसनले बारको निर्वाचन कार्यालय घेराउ गरेसंगै प्रदर्शन गरेको थियो । प्रदर्शनपछि आन्दोलनरत पक्ष र समितिबिच वार्ता सुरु भएको छ।
वार्तामा आन्दोलनरत पक्षबाट डीएलएका केन्द्रीय सचिव शिव रेग्मी, कोषाध्यक्ष हरि बस्नेत र डीएलए काठमाडौंका अध्यक्ष सुशील पौडेल सहभागी छन् । यस्तै निर्वाचन समितिका तर्फबाट रामकृष्ण ढकाल, ताराबहादुर सिटौला, तेजनाथ धमला, सेवन्तराज निरौला र चन्द्रबहादुर शाही सहभागी छन् ।
उच्च अदालत बार एसोसिएसनले काठमाडौं अदालत बारका ७११ जना मतदाताको नाम हटाउनुपर्ने भन्दै उजुरी गरेपछि आज बिहान १० बजेदेखि नेपाली काङ्ग्रेसनिकट डेमोक्रेटिक लयर्स एसोसिएसनले विरोध जनाएको थियो ।
काठमाडौं जिल्ला बारले बार काउन्सिलको नवीकरण नगरेको भन्दै उच्चले उजुरी गरेपछि जिल्ला बार काठमाडौंले पनि नीतिगत रूपमा सबैको छानबिन गर्न माग गर्दै उजुरी गरेको थियो । बार काउन्सिल अद्यावधिक गरे नगरेका सबैको भिडाउनुपर्नेमा निर्वाचन समितिले एकपक्षीय रूपमा काठमाडौं बारको मात्रै छानबिन गर्न लागेकोमा त्यसमा विरोध जनाएको थियो ।
