काठमाडौं । पाकिस्तानको ब्रोड पीकमा भएको हिमपहिरोमा नेपालीसहित अन्तर्राष्ट्रिय आरोहण टोलीका सदस्यहरूको ज्यान गएको घटनाप्रति नेपाल सरकारले औपचारिक रूपमा गहिरो दुःख व्यक्त गरेको छ।
परराष्ट्र मन्त्रालयले आइतबार विज्ञप्ति जारी गर्दै विश्वप्रसिद्ध आरोही निर्मल पुर्जा ‘निम्स दाइ’ सहित सात नेपाली आरोहीको निधनले नेपालको पर्वतारोहण क्षेत्रले अपूरणीय क्षति बेहोरेको जनाएको हो। मन्त्रालयले दिवंगत आरोहीहरूप्रति श्रद्धाञ्जली अर्पण गर्दै शोकसन्तप्त परिवारप्रति समवेदना व्यक्त गरेको छ।
दुर्घटनापछि पाकिस्तानका सम्बन्धित निकाय र नेपाली टोलीले कठिन हिमाली भूभागमा निरन्तर खोज तथा उद्धार अभियान सञ्चालन गरिरहेको मन्त्रालयले जनाएको छ। हालसम्म पुरबहादुर गुरुङ ‘युक्ता’ र ग्यालु शेर्पा को शव फेला परेको छ भने अन्य बेपत्ता आरोहीहरूको खोजी अझै जारी छ।
सरकारले खोज तथा उद्धारमा खटिएका पाकिस्तानी र नेपाली उद्धार टोलीको साहसिक प्रयासको प्रशंसा गर्दै मृतक नेपाली आरोहीहरूको शव स्वदेश ल्याउन इस्लामाबादस्थित नेपाली दूतावासमार्फत आवश्यक कूटनीतिक तथा प्रशासनिक सहजीकरण भइरहेको जानकारी दिएको छ।
ब्रोड पीक दुर्घटनाले नेपालका अनुभवी आरोहीहरूको क्षतिमात्र नभई अन्तर्राष्ट्रिय पर्वतारोहण समुदायलाई पनि गहिरो शोकमा डुबाएको सरकारको भनाइ छ।
