काठमाडौँ । गायिकाको पहिचान बनाएकी बबिता बानियाँ (जेरी)ले कथावाचन गर्ने श्रीमद्भागवत महापुराण सप्ताह ज्ञान महायज्ञ मङ्गलबारबाट सुरु भएको छ । यद्यपि उनले कथावाचन गर्न लागेको विषयमा सरोकारवालाले पक्ष र विपक्षमा टीका टिप्पणी गरिरहेका छन् ।
यस विषयमा जेरीले लोकदोहोरी क्षेत्रमा संघर्ष गरेर आफू चिनिन पनि सफल भएको र अहिले फरक क्षेत्रमा आएकाले आम मानिसमा चासो र बहस हुनु स्वाभाविक भएको बताइन् ।
‘मैले संगीत क्षेत्रमा संघर्ष गरेर पहिचान पनि पाएको हुनाले अहिले गर्न लागेको नयाँ काममा धेरैले चासो र चिन्ता गर्नु भएको रुपमा बुझेकी छु’, उनले भनिन्, ‘यो खास कर्कमाण्डभन्दा पनि श्रीमतभागवतको अध्ययन गरेर मैले एउटा वाचिकाका रुपमा संगीतसहितको प्रवचन गर्न लागेको हुँ ।’
उनले आफूले कुनै अनुष्ठान गर्न नलागेको उनले बताइन् । ‘किनभने सहभागी महायज्ञमा अनुष्ठानमा चाहिँ वैदिक ब्राह्मणहरू छन् । वाचन र संगीतमय कथा प्रवचनको पाटो मेरो हो ।’
उनले आफ्नो विरोध गर्नेहरूले कमजोरी औँल्याइएको भन्दै त्यसलाई सुधारेर अघि बढ्ने र कार्यक्रम सफल बनाएरै छाड्ने बताइन् ।
राजधानीको नागार्जुन नगरपालिका १ रानीवनस्थित महादेवमन्दिर परिसरमा जेरीको वाचन हुने महायज्ञमा पहिलो दिन कलश यात्राका साथै औपचारिक कार्यक्रम भएको जेरीले बताइन् । जेरीले आफूलाई कथाबाचकको रुपमा योगमाया सखीको रुपमा चिनाउन खोजेकी छन् ।
वैदिक सनातन धर्मको सम्वद्र्धन तथा नागभुषण महादेव मन्दिर परिसरको सर्वाङ्गीण भौतिक विकासका लागि महायज्ञ गरिएको आयोजकको भनाइ छ ।
श्री नागभूषणमन्दिर संरक्षणतथा सामुदायिक संस्था तथा श्रीमद्भागवत सेवाकुञ्ज नेपाल आयोजक रहेको उक्त सप्ताह माघ ३० गतेसम्म जारी रहने सांस्कृतिक संयोजक बालचन्द्र बरालले जानकारी दिए ।
महायज्ञमा ५ हजारदेखि माथिका दाताहरूको नाम, २५ हजार भन्दामाथिका दाताहरूको सम्पत्तिको नाम र ५० हजारभन्दा माथिका दाताहरूको तीनपुस्तेको नामसहित मन्दिरमा अभिलेखीकरण गरिने आयोजकको भनाइ छ ।
जोरीले करिब डेढ दशकको दोहोरी गायक यात्राका क्रममा निकै चर्चा कमाएकी थिइन् । अहिले भने उनी अध्यात्मतिर ढल्किएकी हुन् । भागवतको दशकसम्म स्वअध्ययन र डेढ वर्ष नेपाल र भारतमा समेत अध्ययन गरेपछि आफू पहिलो पटक कथावाचनमा जुटेको उनको भनाइ छ । ।
