काठमाडौं । आगामी फागुन २ गतेबाट रिलिज हुने फिल्म ‘दुखी आत्मा’को टिजर सार्वजनिक भएको छ । ३ मिनेट १५ सेकेण्डको टिजरका अधिकांश संवाद द्विअर्थी छन् ।
दीपेन्द्र लामाको लेखन तथा निर्देशनमा तयार भएको यो फिल्ममा हिमाल कडरियाको लगानी छ । सुदिप ढकाल कार्यकारी निर्माता रहेको फिल्ममा आलोक शुक्लाको छायांकन, निमेष श्रेष्ठको सम्पादन छ ।
टिजरमा फिल्मका मुख्य दुई कलाकारहरु नायक दयाहाङ राई र नायिका आँचल शर्मा हाबी छन् । टिजरमा राखिएका द्विअर्थी संवादलाई सुन्ने हो भने फिल्मले एडल्ट कथावस्तुलाई प्राथमिकता दिएको बुझ्न सकिन्छ ।
फिल्ममा अनुप विक्रम शाही, वुद्दि तामाङ, रेअर राई, पुष्कर गुरुङ, कविता आले, लोकेन्द्र लेखक, आरती आचार्य, आशान्त शर्मा, दिया मास्के, लुनिभा तुलाधर, शिशिर वाङ्देल लगायतका कलाकारहरुको फिल्ममा अभिनय छ ।
यसपटक, दयाहाङले आफ्नो काम गर्ने कथावस्तुको शैली फेरेका छन् । दया यो फिल्ममा रोमान्टिक साथै पीडित पनि देखिएका छन् । उनको पीडाको भाव के हो त्यो ट्रेलरले अझै खुलाउनेछ ।
प्रेम दिवसको अवसर पारेर रिलिज हुने फिल्म क्लक वर्क क्रियशनको व्यानरमा यो फिल्म निर्माण भएको हो ।
