काठमाडौं— आईसीसी एक दिवसीय विश्वकप क्रिकेट लिग–२ अन्तर्गत आइतबार राति भएको खेलमा क्यानाडासँग नेपाल ५ विकेटले पराजित भएको छ।
क्यानाडाको किङ सिटीमा टस जितेर सुरुमा ब्याटिङ रोजेको नेपालले क्यानाडालाई जितका लागि १८२ रनको लक्ष्य दिएको थियो।
सुरुमा ब्याटिङ गरेको नेपालले ४६ दशमलव १ ओभरमा सबै विकेट गुमाउँदै १८१ रन बनाएको थियो।
नेपालका लागि सन्दिप लामिछानेले सर्वाधिक ४९ रनको योगदान दिए। उनले ४८ बलमा पाँच चौका र एक छक्काको सहयोगमा ४९ रनको योगदान गरेका हुन। सन्दीपको एकदिवसीय करियरको यो उत्कृष्ट ब्याटिङ हो।
यसअघि उनले सन् २०२३ मा पपुवा न्यूगिनीसँगको खेलमा ५० बलमा अविजित ३५ रन बनाएका थिए। उनी अर्धशतक बनाउन मात्र एक रनले चुकेका हुन्।
त्यसैगरी गुल्सन झाले ५६ बलमा दुई चौका र दुई छक्का प्रहार गर्दै ३४ रन बनाए। करण केसीले २४ रन बनाउँदा सोमपाल कामीले २१ रन जोडे। यसैगरी अर्जुन साउद र आरिफ शेखले समान १०–१० रन बनाए भने भिम सार्की र कप्तान रोहित पौडेलले समान चार–चार रन बनाए।
बलिङतर्फ क्यानाडाका कालीम सानाले तीन विकेट लिए भने हरर्ष ठाकेर र दिलोन ह्यालिगरले समान दुई दुई विकेट लिए। त्यसैगरी प्रभिन कुमार र साद विन जफरले समान एक एक विकेट लिए।
जवाफी ब्याटिङमा उत्रिएको क्यानाडाका लागि दुई ब्याट्सम्यानले शानदार अर्धशतक बनाए। नवनीत धालिवालले ११३ बलको सामना गर्दै ८७ रन बनाउँदा र परगट सिंहले ८३ बलको सामना गर्दै ६४ रन जोडे। क्यानाडाले नेपालले दिएको लक्ष्य पाँच विकेटको क्षतिमा ४२ ओभरमै पूरा गरेको हो।
नेपालका सन्दीप लामिछानेले दुई विकेट लिँदा गुल्सन झा, ललित राजवंशी र करण केसीले समान एकएक विकेट लिए। क्यानाडा भ्रमणमा रहेको नेपालको यो लगातार तेस्रो हार हो। पहिलो खेलमा क्यानाडासँगै १०३ रनले हारेको नेपाल दोस्रो खेलमा ओमानसँग १ विकेटले पराजित भएको थियो।
