काठमाडौं- राष्ट्रिय प्रजातन्त्र पार्टीका अध्यक्ष राजेन्द्र लिङदेनले देश अभिभावकबिहीन भएको बताएका छन् ।
शुक्रवार काठमाडौंमा पार्टीको केन्द्रिय सल्लाहकार समितिको बैठकलाई सम्बोधन गर्दै उनले यस्तो बताएका हुन् ।
नेपाली जनताको मत पाएर बनेका ठूला राजनीतिक दलहरु नै अस्थिरताको कारक रहेको उनको आरोप छ ।
उनले भने, ‘अहिले देश एक प्रकारले अभिभावक बिहीन भएको अवस्थामा छ । नेपाली जनताको मत जसले जसले ठूलो दलको रुपमा प्राप्त गरे, जो अहिले सरकारमा छन् । उनीहरु स्वयं अस्थिरताको कारक छन् ।’
लिङ्देनले आफूले पाएको मौकालाई राजनीतिक दलहरुले व्यक्तिगत र पार्टीको जीवन शासनलाई चिरस्थायी बनाउने काममा मात्रै लगाएको आरोप लगाए ।
उनले नेपालमा दुई दलीय व्यवस्था परिकल्पना गर्नेकुरा सामान्य कुरा नभएको भन्दै काँग्रेस—एमालेको दुई दलीय शासन सामान्य नरहेको जिकिर गरे ।
राजनीतिक दलहरुले सत्ताको दुरुपयोग गरिरहेको आरोप लगाउदै लिङ्देनले राप्रपा जस्तो शक्ति अब पनि बलियो नबने देशले अझै कष्ट व्यहोर्नुपर्ने र देश ठूलो दुर्घटनामा जानसक्ने बताए ।
अध्यक्ष लिङदेनले अहिले देश हेर्दा सब ठिकठाक जस्तो लागेपनि भित्रभित्रै देशको परिस्थिति सामान्य नरहेको जिकिर गरे ।
