काठमाडौं- काठमाडौंमा जारी साफ अन्डर २० फुटबल च्याम्पियनसिपमा नेपाल एक खेल अगावै सेमिफाइनल प्रवेश गरेको छ ।
मंगलबार बंगलादेशले श्रीलंकालाई २-० ले पराजित गरेपछि नेपाल एक खेल अगावै सेमिफाइनलमा पुगेको हो । यसअघि समूह ए को पहिलो खेलमा नेपालले श्रीलंकालाई १-० ले पराजित गरेको थियो ।
बंगलादेशले पनि श्रीलंकालाई हराएपछि दुवै टोलीले समूहको अन्तिम खेल अघि नै सेमिफाइनलमा स्थान पक्का गरेका हुन् ।
दुई खेलमा लगातार हार बेहोरेपछि श्रीलंका भने समूह चरणबाटै बाहिरिएको छ । अब बिहीबार हुने नेपाल र बंगलादेशबीचको खेलले समूह एको विजेताको टुङ्गो लाग्नेछ ।
