काठमाडौं / नेपाली र हिन्दी दुबै भाषामा आउन लागेको चलचित्र ‘परस्त्री’ को प्रदर्शन अनुमति रोकिएको छ । चलचित्रमा राखिएको चुम्बन र बेड सिनका कारण सेन्सर बोर्डले प्रदर्शनका लागि जाँचपासको प्रमाणपत्र दिन अस्वीकार गरेको हो।
आउने साता अर्थात असार १५ गतेबाट प्रदर्शन हुन लागेको सुरस पाण्डे निर्देशित फिल्म ‘परस्त्री’ लाई सो दृश्य हटाउन निर्देशन दिईएको छ । सेन्सर बोर्डका एक अधिकारीका अनुसार चलचित्रमा राखिएको चुम्बन र बेडसिन प्रति आपत्ति जनाउँदै त्यसलाई सच्चाउन र केही दृश्यहरू ‘ब्लर’ गरेर ल्याउन निर्माण टिमलाई निर्देशन दिएको छ ।
मंगलबार सेन्सर बोर्डका पदाधिकारीहरूले फिल्म हेरे पछि सो फिल्मका धेरै दृश्यमा कैँची लगाएका हुन् । बोर्डले समावेश दृश्य हटाउन निर्देशन दिए पनि निर्मात्री शर्मिला पाण्डेले भने त्यसलाई स्वीकार गर्न नसक्ने प्रारम्भिक प्रतिक्रिया जनाएकी छिन् ।
सेन्सर बोर्ड र निमार्ण पक्षको अडानका कारण फिल्म प्रदर्शन अन्यौलमा पर्ने देखिएको छ । सो फिल्ममा कोशिश क्षेत्री, गौरव बिष्ट, शिल्पा मास्के, एलिसा क्षेत्री, अशान्त शर्मा, गीत विष्ट, रामबाबु रेग्मी, सरस्वती अधिकारी आदिको अभिनय रहेको छ ।
