एजेन्सी / कतारमा जारी विश्वकप फुटबलमा आज (शुक्रबार) देखि क्वाटरफाइनल खेलहरू सुरू हुँदैछन् । पहिलो दिन ब्राजिल– क्रोएसिया र नेदल्यान्ड्स–अर्जेन्टिना भिड्दै छन् ।
नेपाली समयअनुसार पौने ९ बजे सुरू हुने खेलमा पाँचपटकको विजेता ब्राजिल र साबिक उपविजेता क्रोएसियाबीच प्रतिस्पर्धा हुन छ । समूह विजेताका रूपमा नकआउट चरण पुगेको ब्राजिलले दक्षिण कोरियालाई ४–१ गोलले हराएर क्वाटरफाइनमा स्थान बनाएको छ ।
यस्तै समूहगत चरणमा एक जित र दुई बराबरीसहित अपराजित रहेको क्रोएसियाले प्रिक्वाटरफाइनलमा जापानलाई टाइब्रेकरमा हराएको थियो ।
ब्राजिल यसअघि अन्तिमपटक सन् २०१४ को विश्वकपमा सेमिफाइनल पुगेको थियो । ब्राजिल र क्रोएसिया यसअघि अन्तिमपटक सन् २०१८ मा प्रतिस्पर्धा गरेका थिए जसमा ब्राजिल ३–१ गोलले विजयी भएको थियो । सन् २००६ र २०१४ को विश्वकपमा पनि यी दुई टोलीबीच प्रतिस्पर्धा भएकामा ब्राजिल दुवैमा विजयी भएको थियो । क्रोएसियाले हालसम्म ब्राजिललाई हराउन सकेको छैन ।
यता पौने १ बजे सुरू हुने खेलमा दुईपटकको विजेता अर्जेन्टिना र तीनपटक फाइनल पुगेर पराजित भएको नेदरल्यान्ड्स भिड्न लागेका छन् ।
सन् १९७८ मा नेदरल्यान्ड्सलाई नै पराजित गरेर पहिलोपटक विश्व विजेता बनेको अर्जेन्टिना सन् २०१४ मा उसैलाई टाइब्रेकरमा हराएर फाइनल पुगेको थियो ।
यसपटक पहिलो खेलमा साउदी अरबसँग पराजित भएपनि त्यसपछि लगातार जित हात पारेर नकआउट चरण पुगेको अर्जेन्टिना अस्ट्रेलियालाई २–१ गोलले हराएर क्वाटरफाइनल आइपुगेको हो। समूहगत चरणमा दुई जित र एक बराबरी खेलेको नेदरल्यान्ड्सले प्रिक्वाटरफाइनलमा अमेरिकालाई ३–१ गोलले हराएको थियो ।
नेदरल्यान्ड्स र अर्जेन्टिना अन्तिमपटक सन् २०१४ को विश्वकप सेमिफाइनलमा भिडेका थिए । नेदरल्यान्ड्ससँग भएका ९ भिडन्तमा अर्जेन्टिनाले तीन जित, दुई बराबरी र चार हारको नतिजा निकालेको छ । सन् २००३ यता नेदरल्यान्ड्सले अर्जेन्टिनालाई हराउन सकेको छैन । जारी प्रतियोगितामा नेदरल्यान्ड्सका कोडी गाक्पो र अर्जेन्टिनाका लियोनल मेस्सी दुवैले तीन तीन गोल गरेका छन् ।
