काठमाडौं / लामो समयको विरोधपछि नेकपा माओवादी केन्द्र एमसीसी अनुमोदानका लागि तयार भएको छ । तर, माओवादी निशर्त तयार भएको भने होइन ।
माओवादीले ‘व्याख्यात्मक टिप्पणी’सहित एमसीसी पारित गर्ने निर्णय गरेको हो । माओवादीको निर्णयसँगै सत्तारुढ गठबन्धनले पनि व्याख्यात्मक निर्णयसहित एमसीसी पारित गर्ने निर्णय गरेको छ । गठबन्धनका शीर्ष नेता अहिले ‘व्याख्यात्मक टिप्पणी’ तयार पार्न जुटेका छन् ।
के हो व्याख्यात्मक टिप्पणी ?
व्याख्यात्मक टिप्पणीमा ‘एमसीसी विशुद्ध आर्थिक सहयोग रहेको र यो अमेरिकी सैन्य रणनीतिसँग सम्बन्धित छैन’ भनेर स्पष्ट उल्लेख गरिनेछ । त्यतिमात्र होइन, उक्त टिप्पणीमा ‘यो परियोजना नेपालको संविधानभन्दा माथि हुने छैन’ भन्नेसमेत लेखिने छ ।
व्याख्यात्मक टिप्पणी एमसीसीकै अंग
माओवादी नेता इन्द्र आङ्बो ‘मौसम’का अनुसार व्याख्यात्मक टिप्पणी एमसीसीकै अंगको रुपमा संसदबाट पारित हुनेछ । एमसीसीकै अंगको रुपमा पारित हुने र उक्त परियोजना नेपालको संविधानभन्दा माथि हुन नसक्ने व्याख्याले जनमानसमा रहेको आशंका निवारण हुनेछ । उनले भने– ‘व्याख्यात्मक टिप्पणीका कारण एमसीसीमा जे खतरा देखिएको थियो त्यो सबै खतरा समाप्त हुन्छ । एमसीसी एउटा सहयोग परियोजनाको रुपमा मात्र संसदबाट पारित हुनेछ ।’
मान्ला त एमसीसीले ?
सत्तारुढ दलले टिप्पणीसहित एमसीसी अनुमोदन गर्ने निर्णय गरेतापनि एमसीसीले उक्त टिप्पणीमा उल्लेख हुने विषय स्वीकार गर्ने या नगर्ने आधिकारिक धारणा सार्वजनिक भएको छैन ।
सत्तारुढ दलले यसअघि नै टिप्पणीसहित पारित गर्न सकिन्छ भन्दै एमसीसीलाई जानकारी गराइसकेको छ । एमसीसीले पनि यस विषयमा सकारात्मक प्रतिकृया दिएको बुझिएको छ ।
एमसीसीले व्याख्यात्मक टिप्पणी स्वीकार गरे नेपालमा कार्यान्वयन हुनेछ । यदि, एमसीसीले उक्त व्याख्यामा असहमति जनाए नेपालमा एमसीसीको च्याप्टर क्लोज हुनेछ ।
सरकारले आजै संसद बैठकबाट व्याख्यात्मक टिप्पणीसहित एमसीसी अनुमोदन गर्ने तयारी थालेको छ । सोही तयारीअनुरुप सत्तारुढ गठबन्धनले टिप्पणीसहित पारित गर्ने निर्णय गरेको हो ।
