धनगढी । सुदूरपश्चिम प्रदेश सरकार विस्तारको तयारी तीव्र बनेसँगै नेकपाभित्र मन्त्री बन्ने आकांक्षीको दौड केन्द्रसम्म पुगेको छ । प्रदेशमा सहमति जुट्न नसकेपछि मन्त्री बन्न इच्छुक १२ जनाकै नाम केन्द्रमा पठाइएको छ । अब यी नाममध्ये पाँच जनाको भाग्य केन्द्रले तय गर्नेछ ।
प्रदेशबाट पठाइएका १२ नाममध्ये तीन जना मन्त्री र दुई जना राज्यमन्त्री बनाउने तयारी छ । मन्त्री छनोटका लागि गठित तीन सदस्यीय कार्यदलले आकांक्षीबीच सहमति जुटाउन नसकेपछि सबैको नाम केन्द्रमा पठाउने निर्णय गरेको हो ।
प्रदेश इन्चार्ज भानुभक्त जोशी, प्रदेश संयोजक हरिराम चौधरी ‘उत्सव’ र संसदीय दलका नेता एवं मुख्यमन्त्री खगराज भट्ट सम्मिलित कार्यदलले नाम टुंग्याउन नसकेपछि अब अन्तिम निर्णयको जिम्मा केन्द्रमा पुगेको छ ।
मन्त्री बन्न साबिक माओवादी केन्द्रबाट ओमविक्रम भाट ‘सरल’, शिवसिंह ओली, मानबहादुर धामी, अक्कल रावल, झपट साउद, लक्ष्मी विक र जानकी पौडेल आकांक्षी छन् ।
त्यस्तै साबिक नागरिक उन्मुक्ति पार्टीबाट कैलाश चौधरी, खुसीराम चौधरी र इन्दिरा गिरी तथा साबिक नेकपा एकीकृत समाजवादीबाट प्रकाश रावल र नरेश शाहीको नाम केन्द्रमा पुगेको छ ।
अब १२ आकांक्षीमध्ये पाँच जनालाई छनोट गर्नुपर्नेछ । अर्थात् मन्त्रीको कुर्सी पाँच जनाका लागि भए पनि दाबेदार १२ जना छन् । केन्द्रको निर्णयसँगै कसले मन्त्रालय पाउने र कसले अवसर गुमाउने भन्ने टुंगो लाग्नेछ ।
सरकारमा थपिने तीन मन्त्रीलाई भौतिक पूर्वाधार विकास, उद्योग–पर्यटन–वन तथा वातावरण र आन्तरिक मामिला मन्त्रालयको जिम्मेवारी दिने तयारी छ । थप दुई जनालाई राज्यमन्त्री बनाइनेछ ।
मुख्यमन्त्री खगराज भट्टले भने सरकार विस्तारको तयारी अन्तिम चरणमा पुगेको बताएका छन् । उनका अनुसार एक–दुई दिनभित्रै मन्त्रिपरिषद् विस्तार गर्ने तयारी छ ।
यससँगै सुदूरपश्चिमको सत्ता समीकरणमा नयाँ चरण सुरु भएको छ । प्रदेशमा सहमति जुटाउन नसकेपछि केन्द्रमा पुगेको मन्त्री छनोटको निर्णयले नेकपाभित्र शक्ति सन्तुलन, क्षेत्रीय प्रतिनिधित्व र मन्त्रालय बाँडफाँटमा कसको प्रभाव कति छ भन्ने पनि देखाउनेछ ।
