बिर्तामोड / प्रदेश १ मा आज मन्त्रिपरिषद विस्तार हुने भएको छ । मुख्यमन्त्री राजेन्द्रकुमार राईले आज(आइतबार) मन्त्रिपरिषदलाई पूर्णता दिनेगरी मन्त्रीहरु नियुक्त गर्ने बताइएको हो ।
मुख्यमन्त्री कार्यालयका अनुसार आज नयाँ मन्त्रीहरुको नियुक्ति हुनेछ । नवनियुक्त मन्त्रिहरुको सपथसमेत आजै हुने तयारी भइरहेको छ । पाँच दलीय गठबन्धनको सरकारमा मन्त्रालय फुटाएरै भागबन्डा मिलान गर्ने सहमति भएअनुसा मन्त्रीहरुको व्यवस्थपान गर्न लागिएको हो ।
गएको आइतवार बसेको मन्त्रिपरिषद् बैठकले सातबाट मन्त्रालयको संख्या बढाएर १२ बनाउने निर्णय गरेको थियो । आज मन्त्री बन्नेहरुमा काँग्रेसबाट प्रदेश सांसद प्रकाशप्रताप हाङ्गाम र शेखरचन्द्र थापा रहेका छन्, जो सभापति शेरबहादुर देउवानिकट हुन् । त्यस्तै कृष्णप्रसाद सिटौलानिकटका ओमप्रकाश सरावगी पनि बन्त्री बन्ने पक्का भएको छ । थापा वन, वातावरण तथा भूसंरक्षण मन्त्री, हाङ्गाम भूमि व्यवस्था मन्त्री र सरावगी उद्योग, श्रम तथा रोजगार मन्त्री बन्ने निश्चित भएको छ ।
त्यस्तै नेकपा माओवादी केन्द्रबाट रामकुमार राई खानेपानी, ऊर्जा तथा सिँचाइ र झलकसिंह दर्लामी कृषि तथा पशुपंक्षी विकास मन्त्री बन्ने पक्का भइसकेको छ ।
नेकपा एकीकृत समाजवादीबाट ३ मन्त्री थपिने भएका छन् । जसमा खिनु लङ्वा लिम्बु पर्यटन तथा संस्कृति मन्त्री, राजन राई सामाजिक विकास मन्त्री र उपेन्द्र घिमिरे सूचना, सञ्चार तथा सहकारी मन्त्री बन्ने पक्का भएको छ ।
हाल प्रदेश १ मा एक राज्यमन्त्रीसहित ६ सदस्यीय मन्त्रिपरिषद् छ ।
