काठमाडौँ / नेकपा (माओवादी केन्द्र)को प्रथम राष्ट्रिय सम्मेलन पुस ११ देखि १३ गते सम्म हुँदै छ । राष्ट्रिय सम्मेलनलाई सभ्य र भव्य बनाउनका लागि जनवर्गीय सङ्गठनले आवश्यक तयारी गरिरहेका छन् ।
सात वटा भौगोलिक र तीन गैरभौगोलिक प्रदेशले सम्मेलनमा सहभागि हुने एक हजार चार सय ८३ प्रतिनिधि तथा पर्यवेक्षक चयन गरिसकेका छन् ।
यस्तै पार्टी केन्द्रीय कार्यालयका तर्फबाट अध्यक्ष पुष्पकमल दाहाल ‘प्रचण्ड’ ले १० प्रतिशत अर्थात एक सय ४८ प्रतिनिधि मनोनयन गर्नेछन्। अध्यक्ष प्रचण्डले मनोनयन गरेका प्रतिनिधिसहित कूल प्रतिनिधि संख्या एक हजार छ सय ३१ पुग्ने छ ।
पार्टीको राष्ट्रिय सम्मेलनमा आयोजक समितिबाट १७९ सहभागी हुने माओवादी केन्द्रीय कार्यालयले जनाएको छ । यस्तै सल्लाहकारबाट १४९, जेष्ठ कम्युनिस्ट मञ्चबाट १२५, केन्द्रीय विभागबाट १०२, केन्द्रीय प्रतिनिधि २७ र प्रदेश प्रतिनिधिबाट ८०३ जना राष्ट्रिय सम्मेलनमा प्रतिनिधि चयन भएका छन् ।
राष्ट्रिय सम्मेलनमा प्रदेश –१ बाट ९६, प्रदेश –२ बाट १०६, वाग्मतीबाट १२८, गण्डकीबाट ७४, लुम्बिनीबाट १०५, कर्णालीबाट ८७, सुदूरपश्चिमबाट ८४, प्रवासबाट ३४, विशेषबाट ४२ र सम्पर्क समन्वय प्रदेशबाट ८३ जना सहभागी हुने व्यवस्था गरिएको छ ।
माओवादीले पहिलो पटक संवैधानिक व्यवस्थाअनुसार नै केन्द्रीय समितिमा महिला, दलित, जनजाति, आदिवासी समुदायलाई विशेष भूमिकासहित जिम्मेवारी दिने भएको छ। महिलालाई अनिवार्यरूपमा ३५ प्रतिशत बराबरको हिस्सा छुट्याइएको छ।
