झापा / पहिराले बगाएको लघुजलविद्युत परियोजनाको संरचना मर्मत नहुँदा म्याग्दीको लुलाङ गाउँ चार महिनादेखि अन्धकारमय बनेको छ । धवलागिरि गाउँपालिका - २, लुलाङ गाउँका बासिन्दा चार महिनादेखि सोलार र टुकीका भरमा छन् ।
वडाबासी ले अन्धकारमा दैनिकी कटाउन बाध्य छन् । गत भदौ २० गते बाढीले बगाएको लघुजलविद्युत परियोजना हालसम्म मर्मत हुन सकेको छैन । लमसुङ्ग स्थित मरेनीको फेदीमा रहेको ४३ किलोबाट क्षमताको दरखोला दोस्रो लघुजलविद्युत परियोजना बाढीले बगाएको थियो । बाढीले विद्युत गृह, कुलो र पोल बगाएको थियो ।
संरचना पुनर्निर्माण नहुँदा स्थानीयवासी सोलार र टुकीको भरमा जीवन चलाइरहेका छन् ।
बाढीले विद्युत गृहसँगै चार पोल र मुहानको बाँध तथा कुलो बगाएको लघुजलविद्युत परियोजनाका सचिव लालबहादुर खड्काथोकीले बताएका छन ।
बाढीले विद्युत गृहका जेनेरेटरलगायत उपकरण बगाएको छ । विद्युत आपूर्ति बन्द हुँदा वडा नं २ का खोरिया, लुलाङ, लमसुङ्ग लगायतका ३५४ परिवार प्रभावित भएका छन् ।
बाढीले एक करोड ५० लाख रुपैयाँभन्दा बढीको क्षति भएको छ ।
परियोजना पुनर्निर्माणका लागि गाउँपालिकाले १० लाख रुपैयाँ र प्रदेश सरकार निर्वाचन क्षेत्र पूर्वाधार विकास कार्यक्रमले १० लाख रुपैयाँ विनियोजन गरेको गाउँपालिकाका अध्यक्ष थमसरा पुनले जानकारी दिएका छन । दुई महिनाभित्र बिजुली बाल्ने प्रयास भइरहेको उनको भनाइ छ ।
