कपिलवस्तु / जनता समाजवादी पार्टीका केन्द्रीय सदस्य मंगलप्रसाद गुप्ता नेकपा एमालेमा प्रवेश गर्ने भएका छन् ।
कपिलवस्तुको वहादुरगञ्जमा हुने एक कार्यक्रममा गुप्तासहितका नेताहरू पार्टी प्रवेश गर्न लागेका हुन्।
कपिलवस्तुका प्रभावशाली नेता गुप्तासहितको टोलीलाई एमालेमा प्रवेश गर्नको लागि अध्यक्ष केपी शर्मा ओली लगायतका नेताहरू कपिलवस्तु जाँदैछन् ।
यसअघि एमाले अध्यक्ष ओली, उपाध्यक्ष विष्णु पौडेल, महासचिव शंकर पोखरेल लगायतका नेताहरूसँग गुप्ताले बालकोटमै पुगेर भेट गरेका थिए ।
एमाले प्रवेश गर्न लागेका गुप्ता विगतमा नेपाली कांग्रेसबाट तराई मधेश लोकतान्त्रिक पार्टी (तमलोपा) हुँदै मधेशी जनअधिकार फोरममा रहेका थिए । गत संसदीय निर्वाचनमा उनी कपिलवस्तु –३ मा फोरमबाट उम्मेदवार बनेका थिए तर नेपाली कांग्रेसका अभिषेकप्रताप शाहसँग पराजित भएका थिए ।
गुप्ता कपिलवस्तु क्षेत्र नम्बर ३ बाट २०७४ को प्रतिनिधिसभा सदस्य निर्वाचनमा दोस्रो स्थानमा थिए। कांग्रेसका अभिषेकप्रताप साहले २० हजार मत प्राप्त गरेर जित्दा उनले करिव १६ हजार मत प्राप्त गरेका थिए।