बिर्तामोड / नेपाल खुला विश्वविद्यालय करिब पाँच महिनादेखि पदाधिकारी विहीन बनेको छ ।
तत्कालीन उपकुलपति प्राध्यापक डा. लेखनाथ शर्मा र तत्कालीन रजिस्ट्रार सहप्राध्यापक कमल ढकालको कार्यकाल पूरा भएपछि खुला विश्वविद्यालय पदाधिकारी विहीन बनेको हो।
पदाधिकारीविहीन हुँदा विश्वविद्यालयको दैनिक कार्यसम्पादनमा असर परेको निमित्त उपकुलपति प्रा.डा. इन्द्रबहादुर कार्कीले बताए ।
विज्ञान, स्वास्थ्य तथा प्रविधि संकायका डीन प्रा.डा. इन्द्रबहादुर कार्की निमित्त उपकुलपतिको जिम्मेवारीमा छन्। उनले भने, ‘नीतिगत कामहरु सबै प्रभावित छ । लामो समयसम्म पदाधिकारी नियुक्ति नहुँदा काम गर्न समस्या भइरहेको छ ।’
पदाधिकारी तथा डीन नहुँदा तिहार लगत्तै हुनुपर्ने बीबीएस र एलएलबीको परीक्षा समेत प्रभावित हुने कार्कीको भनाइ छ ।
उनले भने, ‘परीक्षा गराउनको लागि केन्द्रिय परिषदको बैठक बस्नुपर्छ। परिषदको संयोजक नै रजिष्ट्रार हुनुपर्ने व्यवस्था छ। तर अहिले रजिष्ट्रार नहुँदा समस्या देखिएको छ ।थप समस्या डीनहरु पनि हुनुहुन्न ।’
पदाधिकारी नहुँदा विभिन्न संकायका विद्यार्थीहरूको ट्रान्सक्रिप्ट समेत रोकिएको छ ।
