हुम्ला / हुम्लाको तुम्लिङमा विदेशी नागरिक सहित १२ जना हिमपातमा फसेका छन् ।
उत्तरी नाम्खा गाउँपालिकाको हिल्सा र लिमीका पदयात्रामा आएका स्लोभेनियाका चार नागरिक, तीन पथप्रदर्शक र पाँच स्थानीय आइतबारबाट परेको हिमपातले लिमीको तुम्लिङमा फसेका हुन् ।
हिमपातको कारण नाम्खा गाउँपालिका –६ को लिमीको न्यालु लेकको बाटो अवरुद्ध हुँदा बाटो छिचोल्न नसकेर विदेशीसहित १२ जना तुम्लिङमा रोकिन बाध्य भएको प्रमुख जिल्ला अधिकारी गणेश आचार्यले जानकारी दिए ।
न्यालु लेकमा तीन फिटभन्दा बढी हिमपात परेकाले बाटो बन्द भएपछि स्थानीय नागरिक आन्तरिक तथा बाह्य पर्यटकलाई आवतजावतमा समस्या रहेको नाम्खा गाउँपालिका –६ का वडाध्यक्ष पाल्जोर तामाङले बताए ।
उद्धारका लागि हेलिकोप्टरको व्यवस्थाका लागि गृहमन्त्रालयमा पत्र पठाएको भए पनि मौसम सफा नभएको कारण उनीहरूको उद्धार हुन् नसकेको प्रमुख जिल्ला अधिकारी गणेश आचार्यले जानकारी दिए ।
