काठमाडौँ / प्रतिनिधिसभा, शिक्षा तथा
स्वास्थ्य समितिले कक्षा १२ को परीक्षा जनस्वास्थ्यका मापदण्ड प्रयोग गरेर मात्र
सञ्चालन गर्न निर्देशन दिएको छ ।
समितिको आज बसेको बैठकले ‘कोभिड–१९ को सङ्क्रमणका
बीचमा कक्षा १२ लगायत अन्य परीक्षा सञ्चालन र स्वास्थ्य मापदण्ड’ विषयको छलफलमा जनस्वास्थ्यका मापदण्ड पूरा गरेर मात्र परीक्षा सञ्चालन गर्न
निर्देशन दिएको हो ।
समिति सभापति जयपुरी घर्तीले परीक्षा केन्द्रमा चिकित्सक, नर्स र औषधिको
व्यवस्था गरेर मात्र परीक्षा सञ्चालन गर्नुपर्ने बताएका छन् । “परीक्षार्थीलाई
महामारीबाट जोगाउन जनस्वास्थ्य सम्बन्धी मापदण्ड लागू गरी परीक्षा सञ्चालन
गर्नुपर्दछ”, उनि भन्छन्, “सङ्क्रमितलाई छुट्टै कक्षा कोठा व्यवस्था गरिनुपर्दछ ।”
राष्ट्रिय परीक्षा बोर्डले यही साउन ३१ गतेदेखि कक्षा १२ को
परीक्षा भौतिक उपस्थितिमा सञ्चालन गर्ने भएको छ । चार लाख परीक्षार्थीले चार हजार
३३५ परीक्षा केन्द्रबाट करीब ९० विषयको परीक्षा दिँदैछन् ।
समिति सदस्य गिरिराजमणि पोखरेलले भौतिक उपस्थितिमा परीक्षा
सञ्चालनका लागि शिक्षक र विद्यार्थीलाई खोप उपलब्ध गराउनुपर्नेमा जोड दिएका छन् । उनले
माध्यमिक शिक्षा परीक्षा ९एसइई० मा विद्यालयले आफैँ आन्तरिक मूल्याङ्कन गरेर
पठाउने क्रममा अनियमितता गरेकाले कार्यविधि परिवर्तन गरिनुपर्नेमा सु्झाव दिएका
छन् ।
सदस्य विद्या भट्टराईले विद्यार्थीलाई भीडभाड नगरीकन
परीक्षा दिनपाउने वातावरण बनाउनुपर्ने आवश्यकता रहेको बताएकी छन् । उनले परीक्षा
केन्द्रित पढाइ भएकाले पठनपाठन शैलीमा परिवर्तन गर्नुपर्ने धारणा पनि व्यक्त गरेकी
हुन् । सदस्य मानबहादुर विकले एकै दिन एउटा मात्र परीक्षा गर्ने गरी तालिका बनाउन
आग्रह गरेका छन् । अर्का सदस्य मनकुमारी जिसी, अन्जना
विशङ्खेलगायतले पनि विद्यार्थीलाई सङ्क्रमणबाट बचाउन सकिने गरी परीक्षा सञ्चालन
गर्न सुझाव दिएका छन् ।
बैठकमा शिक्षा, विज्ञान तथा
प्रविधि मन्त्रालयका सचिव रामप्रसाद थपलियाले समितिले दिएको सुझावअनुसार परीक्षा
सञ्चालन गरिने बताएका छन् । उनले ‘भर्चुअल’ विधिबाट पढाइ भए
पनि दुर्गम क्षेत्रमा इन्टरनेटको समस्याका कारण प्रभावकारी हुन नसकेको बताएका छन् ।
सङ्क्रमित विद्यार्थीले पछि परीक्षा दिन पाउने
बोर्डका सदस्यसचिव दुर्गाप्रसाद अर्यालले विद्यार्थीलाई
सङ्क्रमणबाट जोगाउन छुट्टै होमसेन्टरको व्यवस्था गरिएको र अहिलेको परीक्षामा
सहभागी हुन नसकेका सङ्क्रमित विद्यार्थीले पछि पनि परीक्षा दिने पाउने जानकारी दिएका
छन् । “सङ्क्रमित भएर पनि परीक्षामा सहभागी हुनसक्ने परीक्षार्थीलाई अलग्गै कक्षा
कोठाको व्यवस्था गरेका छौ ”, उनी भन्छन्, “ती विद्यार्थी
परीक्षा शुरु भएको आधा घण्टापछि परीक्षा केन्द्रमा प्रवेश गर्नेछन् । अन्य
विद्यार्थीको सकिएको आधा घण्टाको समयसम्म परीक्षा दिन पाउनेछन् ।” बोर्डले २००
भन्दा बढी विद्यार्थी भएका विद्यालयको परीक्षा केन्द्र दुईवटा हुने जनाएको छ ।
सदस्यसचिव अर्यालका अनुसार करीब चार लाख विद्यार्थी कक्षा
१२ को परीक्षामा सहभागी हुँदैछ । पच्चिस विद्यार्थी भएका विद्यालय एक हजार १००, २६ देखि ५०
परीक्षार्थी भएका विद्यालय दुई हजार ३००, ५१ देखि १०० सम्म
परीक्षार्थी भएका विद्यालय दुई हजार ४००
छन् भने ५०० परीक्षार्थी भएका
विद्यालय कमै मात्र छन् ।
प्रश्नपत्र अनलाइन र हातेप्रश्नपत्र
बोर्डले परीक्षाका लागि अनलाइनबाट पनि प्रश्नपत्र पठाउने
भएको छ । नब्बे प्रतिशत विद्यालयमा अनलाइनबाट र अन्य विद्यालयमा हाते प्रश्नपत्र
पठाइने भएको छ ।
हाते प्रश्नपत्र र अनलाइनबाट पठाइएका प्रश्नपत्र भने फरक–फरक हुनेछन् । गत
वर्ष ४० पूर्णाङ्कको मात्र परीक्षा भएकामा
यसपटक १०० हुने भएको छ ।
