वाग्मती / साउन ३१ गतेदेखि सञ्चालन हुने कक्षा १२ को
परीक्षामा मकवानपुर जिल्लाबाट पाँच हजार ३९१ विद्यार्थी सहभागी हुने राष्ट्रिय
परीक्षा बोर्डको हेटौँडा कार्यालयले जानकारी दिएको छ ।
विश्वव्यापीरुपमा महामारीका रुपमा फैलिएको कोरोना जोखिम नै
रहेको अवस्थामा विद्यार्थीहरुको भौतिक उपस्थितिमा स्वास्थ्य सुरक्षाका मापदण्ड पूरा गरी परीक्षा सञ्चालन हुने
कार्यालयका प्रमुख कृष्णप्रसाद घिमिरेले जानकारी दिएका छन् ।
यस वर्ष विद्यार्थीले आफू अध्ययनरत् कलेज तथा
विद्यालयबाट कक्षा १२ को परीक्षामा सहभागी
हुन पाउनेछन् । जिल्लाको सबैभन्दा धेरै विद्यार्थी अध्ययन गर्ने मकवानपुर बहुमुखी
क्याम्पसबाट एक हजार ३०० विद्यार्थी कक्षा १२ को परीक्षामा सहभागी हुने सो
क्याम्पसले जनाएको छ ।
त्यस्तै हेटौँडा क्याम्पसबाट नियमिततर्फ ३१३ जना विद्यार्थी
कक्षा १२ को सो परीक्षामा सहभागी हुने हेटौँडा क्याम्पसका प्रमुख देवेन्द्र
मानन्धरले जानकारी दिएका छन् ।
