सिन्धुपाल्चोक / हेलम्बुका बाढी प्रभावितलाई अस्थायी आवास निर्माण शुरु भएको छ । लोकप्रिय
टेलिभिजन कार्यक्रम इन्द्रेणीले विपद्ग्रस्त क्षेत्र हेलम्बुका प्रभावित १७
परिवारको अस्थायी आवास निमार्णको जिम्मा लिएको छ ।
हेलम्बु गाउँपालिकाको
हल्दे, तिम्बुलगायतका बाढी प्रभावितको घर बनाउने जिम्मा लिएको इन्द्रेणीका अध्यक्ष
कृष्ण कँडेलले जानकारी दिएका छन् । मङ्गलबार हेलम्बु गाउँपालिका र
इन्द्रेणीबीच घर बनाउने सम्झौता भएको हो । तीन लाख ६६ हजार रुपैयाँ बराबरको अनुमानित
लागतमा निर्माण हुने घरमा दुई कोठा, भान्छा, शौचालय र धारा
हुनेछन् । हेलम्बु गाउँपालिकाका अध्यक्ष निमा ग्याल्जेन शेर्पालाई कँडेलले ६२ लाख रुपैयाँ हस्तान्तण गरेर यथाशीघ्र घर निमार्णको काम अगाडि बढाउन आग्रह गरेका छन् ।
कार्यक्रममा अध्यक्ष
शेर्पाले हेलम्बुलाई सहयोग गरेकामा धन्यवाद दिँदै दशैँसम्ममा आफ्नै घरमा प्रभावित
जनतालाई साररै छाड्ने प्रतिबद्धता जनाएका छन् । उनले हेल्भेटास नेपालबाट ४० र केयर
नेपालबाट २० वटा निमार्णको शुरु भइसकेको जानकारी दिएका छन् । गाउँपालिकाले बनाएको
मापदण्ड र प्राविधिक लागतअनुसार एकै किसिमको घर निर्माण गर्ने लक्ष्य लिइएको
गाउँपालिकाले जनाएको छ ।
कूल १०७ घरपरिवार
विस्थापित रहेको तथ्याङ्क रहे पनि करिब ९० घर पूर्णरूपमा क्षति भएको अध्यक्ष
शेर्पाले बताएका छन् । उनले अहिले अस्थायी आवास निर्माणलाई प्राथमिकता दिइएको र
सरकारले दिने पाँच लाख रुपैयाँ आउने बित्तिकै स्थायी आवासका निम्ति काम
थाल्नेसमेत जानकारी दिएका छन् । मेलम्ची नगरपालिकामा पनि केयर नेपाललगायतले आवास
निर्माण गर्ने बताइएको छ ।
बाढीबाट प्रभावित
स्थानीय तहलाई १२ लाख रुपैयाँ सहयोग
गत असार १ गतेको
अविरल वर्षा र भीषण बाढीबाट प्रभावित स्थानीय तहहरु मेलम्ची नगरपालिका, पाँचपोखरी थाङपाल गाउँपालिका र हेलम्बु गाउँपालिकालाई नेपाल सरकारका पूर्वसचिव
सुमनप्रसाद शर्माको टोलीले रकम सहयोग गरेको छ ।
मेलम्ची नगरपालिका र
पाँचपोखरी गाउँपालिकालाई तीन/तीन लाख रुपैयाँ र हेलम्बु गाउँपालिकालाई छ लाख रुपैयाँ हस्तान्तरण गरिएको मेलम्ची खानेपानी विकास
समितिका सामाजिक विकास विज्ञ डा.शम्भुप्रसाद कट्टेलले जानकारी दिएका छन् । सो रकम मेलम्ची नपामा सोमबार
नगरप्रमुख डम्बर अर्याललाई हस्तान्तरण गरिएको थियो । पाँचपोखरी थाङपाल गापा
अध्यक्ष टासी लामा काम विशेषले काठमाडौँमा रहेकाले उनलाई भेट गरी मङ्गलबार हस्तान्तरण गरिएको
कट्टेलले बताएका छन् ।
त्यस्तै सोमबार
हेलम्बु गाउँपालिकालाई छ लाख रुपैयाँ रकम सहयोग गरिएको छ । सो रकम अध्यक्ष निमा
ग्याल्जेन शेर्पालाई सोमबार हस्तान्तरण गरिएको हो । रकम प्रदान गर्दै कट्टेलले
हेलम्बुको समस्यामा सहयोगका लागि लागि पर्दा शुभेच्छुकबाट स्वःस्फूर्तरूपमा
सङ्कलित भएको रकमले सानै भए पनि सहयोग पुग्ने विश्वास व्यक्त गरेका छन् ।
सहयोग रकम नेपाल
सरकारका पूर्वसचिव शर्माको अग्रसरतामा मेलम्ची खानेपानी विकास समितिका सामाजिक
विकासविज्ञ डा.कट्टेल र कर्मचारी ऋषिराम पौडेलको
प्रत्यक्ष सहभागितामा मेलम्ची खानेपानीसँग जोडिएका व्यक्ति, संस्था, कम्पनी तथा आयोजनाका कर्मचारीबाट सङ्कलित
भएको रकम हो ।
