बागलुङ / विषाक्त मदिरा
पिएर चारजना मजदूरको मृत्यु भएको घटनाको छानबिन गर्न अनुसन्धान समिति गठन भएको छ ।
जिल्ला प्रहरी कार्यालय बागलुङका प्रवक्ता समेत रहेका प्रहरी नायब उपरीक्षक
हवारीको नेतृत्वमा पाँच सदस्यीय अुनसन्धान समिति गठन भएको प्रहरीले जनाएको छ ।
बागलुङमा सोमबार साँझ विषाक्त मदिरा पिएका ६ मध्ये चारजनाको
मृत्यु भएको थियो । मृत्यु हुनेमा गलकोट नगरपालिका–७ मल्मस्थित
खानेपानी आयोजनामा काम गर्ने २१ वर्षीय दीपेन्द्र पुन, ३९ वर्षीय
दूधबहादुर राना, ५१ वर्षी रेखबहादुर राना र ३० वर्षीय प्रवीन घर्ती रहेका छन् ।
उनीहरुको उपचारका क्रममा मृत्यु भएको बताइएको छ । त्यस्तै
उनीहरुसँगै मदिरा खाएका ३८ वर्षीय खेमराज घर्ती र २६ वर्षीय रवीन्द्र पुनको अवस्था
गम्भीर रहेको र धौलागिरि अस्पतालमा उपचार सम्भव नभएपछि दुबै जनालाई गण्डकी अस्पताल
पोखरा पठाइएको छ ।
बागलुङमा पहिलोपटक चारजनाको विषाक्त रक्सी सेवनका कारण
ज्यान गएपछि प्रहरी गम्भीर भएर अनुसन्धानमा लागेको प्रहरी प्रमुख एवम् प्रहरी
उपरीक्षक कृष्णबहादुर पल्लि मगरले जानकारी दिएका छन् । “सात दिनको समय
दिएर डिएसपी सापको नेतृत्वमा टोली पठाएको छु”, उनि भन्छन्, “अहिलेसम्म दुईजना
पक्राउ परेका छन्, मजदूरले खाएका चाउचाउ, दालमोठ र मदिराका
भाँडाहरुसमेत बरामद गरेका छौँ ।” पक्राउ पर्नेमा पसल सञ्चालक भद्रबहादुर थापा र
स्थानीयवासी भक्तबहादुर बलाल रहेका छन् ।
उनीहरुसँग अहिले सोधपुछ चलिरहेको र शवपरीक्षणको रिपोर्ट
आएपछि थप अनुसन्धान अगाडि बढाइने उनले जानकारी दिएका छन् ।
