गोरखा / बाढीसँगै आएको पहिरोले उत्तरी गोरखाको धार्चे गाउँपालिकामा
रहेको झोलङ्गे पुलमा क्षति पुर्याएको छ।
पहिरोसँगै खसेको ठूलो रुखले धार्चेगाउँपालिका–५ को माछाखोला र वडा नं ३ को उहियाँ खोला जोड्ने झोलुङ्गे
पुलको एकतर्फको लठ्ठा चुँडिएर क्षति भएको स्थानीयवासी प्रतापमान गुरुङले जानकारी दिएका
छन्।
आइतबार राति परेको अविरल वर्षापछि आएको बाढीका कारण खोला
तर्फबाट खसेको पहिरोले पुलमा क्षति पुर्याएको उनले बताएका छन् । “माथि भिरबाट ठूलो रुख ढलेर पुलमा खसेका कारण पुलको
एकातर्फको लठ्ठा चुँडिएको छ”, उनि भन्छन्, “तत्काल मर्मत सम्मार गर्न नसके यहाँका नागरिकले
सास्ती खेप्नुपर्ने अवस्था बनेको छ ।”
२०६० सालमा बिपीको सहयोगमा निर्माण भएको उक्त पुलमा क्षति
पुगेपछि उत्तरी गोरखाको धार्चे र चुमनुब्री गाउँपालिकाका नागरिकसँगै पर्यटकलाई
समेत समस्या भएको उहीयाँ खोलाका स्थानीयवासी दिलबहादुर गुरुङले बताएका छन् ।
जिल्लाको पर्यटकीय मार्गको रुपमा चिनिने मनास्लु पदमार्ग
प्रवेश गर्ने झोलुङ्गे पुलको लठ्ठा चुँडिएपछि अहिले जोखिम मोलेर आउजाउ गर्न बाध्य
भएको उनको भनाइ छ । “माछा खोलामाथिको
पुल उत्तरी गोरखाका सर्वसाधारण र पर्यटक आउजाउ गर्ने पुल हो”, उनि भन्छन्, “यो पुल नतरी
उत्तरी क्षेत्र पुग्न सकिदैन, अहिले पुल तर्न
ज्यानको जोखिम मोल्नुपर्ने बाध्यता छ ।”
दैनिक आवातजावत गर्न समस्या भएपछि स्थानीयवासी मिलेर
पहिरोसँगै आएको रुख हटाएर पुलको एकतर्फको लठ्ठामा भुण्डिएर वारपार गर्न सक्ने
बनाएको गुरुङले जानकारी दिएका छन् । जेठको अन्तिम सातादेखि परेको वर्षाका कारण
पदमार्गसमेत अवरुद्ध भएपछि नेपाली सेनाले केही दिनअघि मात्र पदर्माग सफा गरेको
थियो । तर फेरि पहिरोले पुलमा क्षति पुर्याएपछि समस्या भएको गुरुङको भनाइ छ ।
पुलमा क्षति पुगेसँगै खच्चडबाट सामान ढुवानीमा समस्या भएको
स्थानीय व्यवसायी शर्मिला गुरुङले जानकारी दिएका छन् । खच्चडबाट सामान ढुवानी
गर्नुपर्ने सो क्षेत्रमा ढुवानी गर्न सक्ने अवस्था नभएपछि दैनिक उपभोग्य वस्तुको
अभाव हुनसक्ने उनले चिन्ता व्यक्त गरेका छन् ।
