काठमाडौं। राष्ट्रिय स्वतन्त्र पार्टी (रास्वपा)की सचेतक क्रान्तिशिखा धितालले संसद्लाई अझ प्रभावकारी, परिणाममुखी र व्यवस्थित बनाउन सत्ता पक्ष सक्रिय रूपमा काम गरिरहेको बताएकी छन्। आगामी संसदीय बैठकहरूमा सरकारबाट नयाँ–नयाँ विधेयक आउने तयारी भइरहेकाले संसद्को व्यस्तता उल्लेख्य रूपमा बढ्ने उनले संकेत गरिन्।
मंगलबार सिंहदरबारमा सभामुखसँगको छलफलपछि सञ्चारकर्मीसँग प्रतिक्रिया दिँदै धितालले लगातार सदन सञ्चालन हुँदा सांसदहरू आफ्ना निर्वाचन क्षेत्र र मतदातासँग प्रत्यक्ष सम्पर्कमा जान नपाएको बताइन्। यही कारण सांसदहरूलाई जनतामाझ पुग्ने अवसर दिन दुई साताको संसदीय विश्राम दिइएको उनको भनाइ थियो।
उनका अनुसार आगामी अधिवेशनलाई अझ प्रभावकारी बनाउने विषयमा सभामुखसँग प्रारम्भिक छलफल भएको छ। सरकारले ल्याउने तयारी गरेका धेरै विधेयक अझै सार्वजनिक नभए पनि ती छिट्टै संसद्मा प्रवेश गर्ने अपेक्षा गरिएको उनले जानकारी दिइन्। धितालले रास्वपा संसदीय अभ्यासमा अपेक्षाकृत नयाँ भएकाले केही प्रक्रियागत कमजोरी देखिन सक्ने स्वीकार गरिन्। तर, विगतका कमजोर संसदीय अभ्यासलाई दोहोर्याउनेभन्दा नयाँ, पारदर्शी र सकारात्मक कार्यशैली स्थापित गर्ने प्रयास भइरहेको उनको दाबी छ।
सदनमा देखिएको राजनीतिक असमझदारी अन्त्य गर्न सत्ता पक्ष र प्रतिपक्षबीच निरन्तर संवाद भइरहेको उल्लेख गर्दै उनले केही दिनभित्रै सहमतिको वातावरण बन्ने विश्वास व्यक्त गरिन्। सरकारका आगामी विधेयक र दलहरूबीचको सहकार्यले संसद्को आगामी अधिवेशन थप व्यस्त र निर्णायक हुने संकेत देखिएको छ।
